Ааспыт нэдиэлэҕэ Э.К. Пекарскай аатынан Игидэй орто оскуолатыгар федеральнай бырайыак чэрчитинэн саҥа кабинет арыллыыта буолан ааста. Үөрүүлээх линейка Арассыыйа, Саха сирин уонна Таатта гиимнэринэн аһылынна. Улуустааҕы үөрэх салаатыттан салайааччылар Иннокентий Иннокентьевич Дягилев, Татьяна Алексеевна Тютрина кэлэн кыттыыны ыллылар.
Оскуола дириэктэрэ Андрей Александрович Миронов киирии тыл эттэ:
— Быйылгы үөрэх дьылыгар саҥа тэрил кэллэ. Түгэнинэн туһанан махтал тыллары этиэхпин баҕарабын улуустааҕы үөрэх салаатын начальнигар Дягилев Иннокентий Иннокентьевичка уонна үлууспут салалтатыгар, баһылыкка Айаал Семенович Бурцевка. Бу кэлбит тэрил сыаната түөрт мөлүйүөн кэриҥэ сууммалаах: 41 ноутбук, 3 интерактивнай панель, 3 видеокамера уонна МФУ принтер. Бу кабинет уонна оборудование үөрэх хаачыстыбатыгар оҕолор билиилэрин-көрүүлэрин үрдэтиилэригэр төһүү күүс буолуоҕа. Ааспыт ыйга учууталлар атырдьах ыйынааҕы сүбэ мунньахтарыгар баран кэллибит. Оскуолаларынан сылын аайы тестирование оҥоһуллар. Ол түмүгүнэн Э.К. Пекарскай аатынан Игидэй орто оскуолата инники күөҥнэ сылдьар. Ити таһыммытын түһэрбэккэ, өссө инники диэки баран иһиэхтээхпит. Манна үлэбит көрдөрүүтэ барыта киирэр. Эксээмэннэрбит, араас тестированиеларга көрдөрүүлэрбит, үөрэх өттүгэр туох баар түмүктэрбит барыта түмүллэллэр. Бу кабинет арыллан биһиэхэ күүс-көмө буолуо диэн эрэнэбит. Өссө да ситиһиилэр кэлэ турдуннар!
Салгыы тыл салайааччыга И.И. Дягилевка бэрилиннэ: «Үөрэх Министиэристибэтин сүнньүнэн, аныгы олох ирдэбилигэр эппиэттиир, сүрдээх үчүгэй цифровой оборудованиелар кэллилэр. Биһиги үөрэнээччилэрбит Москва, Санкт-Петербург уонна да атын улахан куораттар оҕолорун кытта тэҥҥэ сайдаллар. Оҕолорбут үүнэллэригэр-сайдалларыгар сөптөөх, илин былдьаһар дьоҕурдаах буолалларыгар туһаайыллыбыт «Цифровая образовательная среда» федеральнай бырайыак чэрчитинэн кэллэ. Айаал Семенович Бурцев, улууспут депутаттарын мунньаҕын уонна үөрэх салалтатын ааттарыттан эһигини эҕэрдэлиибин. Бу бырайыак үлэлээбитэ бэһис сыла. 2019 сылтан Бүтүн Арассыыйа үрдүнэн 21 тыһыынчаттан тахса оскуола бу бырайыакка холбосто. Бүтэһик үлэлиир сылыгар Игидэй оскуолатыгар киирэр. Бүтэһик сылыгар хаһааҥҥытааҕар да элбэх үп-харчы көрүллүбүтэ. Онно эһиги оскуолаҕыт таба тайанан тигистэ. Онон үөрэхпит хаачыстыбата тупсарыгар инникитин төһүү күүс буолуохтаах. Инники үлэбитигэр программированиеҕа, сыыппара эйгэтигэр сыһыаннаах үлэлэрбитигэр туһалыаҕа. Биһиги дойдубут Бэрисидьиэнэ В.В. Путин этэн турардаах, аан дойдуга буола турар ыарахан кэмҥэ дойдубут бэйэтин бэйэтэ хааччынар буолуохтаах диэн. Туох баар эйгэҕэ аныгы олоххо эппиэттиир каадырдарынан толору хааччыллыы баар буолуохтаах. Бэйэбитин бэйэбит ииттиниэхтээхпит. Оччоҕуна ханна да бэриммэт сайдыылаах дойду быһыытынан үүнүөхтээхпит. Инники олохпутун түстүөхтээхпит. Ити үлэ барыта детсад, оскуола саҕаттан ыытыллыахтаах. Ол иһин маннык бырайыактар олоххо киирэллэр. Оҕолорбут сайдалларыгар бигэ тирэх буолаллар. Үөрэхтээһиҥҥэ ыытыллар араас куонкурустарга кыттабыт. Сыыппара эйгэтигэр Игидэй оскуолата үлэлээбитэ ыраатта. Улууска бастакынан «Точка роста» федеральнай бырайыакка 2019 сыллаахха киирбитэ. Оҕолорбут өрөспүүбүлүкэҕэ ыытыллар күрэхтэргэ инники күөҥҥэ хас да сыл сылдьан кэллилэр. Дойду таһымыгар Арассыыйаҕа тиийэ күрэхтэһэллэр. Ити барыта бу оскуола сөптөөх билиини-көрүүнү биэрэриттэн кэлэр. Былырыыҥҥы үөрэх дьылыгар киэн туттар үөрэнээччилэрбит Айта Аргунова, Илья Лопатин «Виртуальная и дополненная реальность» диэн компетенцияҕа соҕуруу куорат гимназияларын оҕолорун кытта күрэс былдьаһан ситиһиилээхтик кыттан, өрөспүүбүлүкэ, улуус чиэһин көмүскээн кэлбиттэрэ. Маны таһынан хаһан да буолбатах ситиһии кэллэ. Ытык Күөл бастакы нүөмэрдээх оскуолатын үөрэнээччитэ В. Андросов «Лечебное дело» диэн компетенцияҕа иккис миэстэни ылары ситистэ. «Профессионалы» диэн күрэх инники идэни баһылыырга диэн туһаайыллар. Оҕо оскуола эрдэхтэн бэлэмнэнэн үчүгэй специалист буоларга үөрэнэр. Салгыы иннибитигэр үгүс үлэлэр ыытыллаллар. Оҕо үөрэнэригэр туох баар усулуобуйа барыта тэриллэр. Оскуолалар өрөмүөннэригэр тиийэ үлэлэр ыытыллаллар. Быйыл Таатта улууһугар өссө биир саҥа таас оскуола аанын тэлэччи аһыаҕа. А.Е. Мординов аатынан Тааттатааҕы лицей саҥа таас дьиэтэ үлэҕэ киириэҕэ. Арассыыйа Бырабыытылыстыбатын бэрэссэдээтэлэ М.В. Мишустин бэйэтинэн бу тутуу барарыгар илии баттаан турар. Биһиги кэнчээри ыччаттарбыт саҥа таас оскуолаҕа үөрэнэллэрин туһугар туһаайыллыбыта. Аны кэлэр сайын 22 төгүлүн ыытыллар «Манчаары оонньуулара» буолуоҕа. «Манчаары оонньууларын» «Саха олимпиадата» диэн ааттыыллар. Онон улууспут киинигэр элбэх тутуу үлэҕэ киирэр. Үөрэххэ эрэ буолбакка, спорт өттүгэр эмиэ ситиһиилээх буолуохтаахпыт. Эт-хаан өттүнэн эрчиллэн спорду эмиэ өрө тутуохтаахпыт. Онон бу үөрүүлээх күнүнэн эҕэрдэлээн тураммын, үөрэххэ, спортка үрдүктэн үрдүк ситиһиилэри баҕарабын! Федеральнай бырайыак Игидэй оскуолатыгар киирбитинэн сүрдээх улахан эппиэтинэс күүтэр» диэн туран Таатта улууһун үөрэх салаатын аатыттан оскуола директорыгар А.А. Мироновка махтал сурук туттарда.
Кини кэнниттэн тылы Игидэй нэһилиэгин баһылыга Марков Егор Алексеевич эттэ. Тэтимнээхтик баран иһэр олохпутугар сыыппара эйгэтэ бигэтик киирдэ. Оҕолорбут, учууталларбыт бу федеральнай бырайыагынан кэлбит кабинеты сөпкө туһаныахтара диэн эрэнэбин диэн эттэ. Кабинеты аһар лентаны үөрүүлээх быһыыга-майгыга кырыйыы кэннэ, кабинекка экскурсия буолла. Ол кэнниттэн үөрэх салаатын начальнига И.И. Дягилев оҕолору кытта көрсүстэ.
Г.С. Попова, Игидэй оскуолатын педагог-библиотекара.