Олунньу 24-25 күннэригэр өрөспүүбүлүкэҕэ «Этномедиа уонна ыччат эйгэтигэр Этнотуризм» «Импульс-2022» норуоттар икки ардыларынааҕы VI ыччат форума саҕаланна. Тэрээһини А.Е. Кулаковскай аатынан Норуоттар доҕордоһууларын дьиэтин ресурснай киинэ, «Мы — россияне» өрөспүүбүлүкэтээҕи салаата, Саха сирин норуоттарын ыччатын Ассамблеята тэрийэн ыытар. СӨ тас сибээс министиэристибэтин уонна СӨ ыччат дьыалаларыгар уонна социальнай коммуникацияҕа министиэристибэтин өйөбүлүнэн икки күннээҕи улахан тэрээһин ааһар.
Маҥнайгы күн СӨ бырабыыталыстыбатын уонна баһылыгын дьаһалтатын салайааччыта Георгий Михайлов, СӨ тас сибээс уонна норуоттар дьыалаларыгар министиэристибэтин миниистирин солбуйааччыта Татьяна Пяткина, СӨ «Конгресс-центр Якутия» судаарыстыбаннай автономнай тэрилтэ салайааччытын солбуйааччыта Аида Антонова, А.Е. Кулаковскай-Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрин солбуйааччы Александр Колесов көрсүһүү кыттыылаахтарыгар эҕэрдэ тылы эттилэр.
Үөрүүлээх түгэҥҥэ Норуоттар доҕордоһууларын дьиэтин дириэктэрэ Антонида Корякина быйыл Алексей Кулаковскай төрөөбүтэ 145 сылыгар аналлаах Өйдөбүл сылын аһыллыытын биллэрдэ.
Форум бастакы күнүн сүрүн чааһыгар Норуоттар икки ардыларынааҕы суруналыыстар гильдияларын бэрэсидьиэнэ уонна «Национальный акцент» портал кылаабынай эрэдээктэрэ Маргарита Лянге, «Интеллектуал» култуурнай-иһитиннэрэр киин дириэктэрэ Эльвира Куклина, «Мы – россияне» ассамблея координатора Ермек Хапизов тыл эттилэр.
Бүгүн форум иккис күнүгэр экспертэри, Татарстан уонна Дагестан ыччатын кытта көрсүһүү буолла, итиэннэ «XXII-с үйэ ыччатыгар туһаайыы» флешмоба саҕаланна.
Кыттааччылар этэллэринэн, форум өрөспүүбүлүкэ эрэ ыччатын буолбакка, тас дойдулартан, Арассыыйа эрэгийиэннэриттэн элбэх ыччаты муста. Ыччат санаата биир — иллээх-эйэлээх олох, норуоттар икки ардыларыгар доҕордоһуу сыһыан.