Билигин тыйаатырга, култуура кииннэрин тэрээһиннэригэр ыарыыны тарҕаппат туһугар ылыллыбыт миэрэлэри тутуһан сылдьыахха сөп буолла.
Соторутааҕыта Дьокуускай куорат 17 №-дээх оскуолатын 9-в кылааһын үөрэнээччилэрэ Үүнэр көлүөнэ тыйаатырыгар режиссер Розалия Тартакынова туруорбут «Сыһыаннаах дьоҥҥо барыларыгар» испиктээкил сүрэхтэниитигэр сырыттылар.
Тыйаатырга «Пушкинскай каартанан» үс оҕо сырытта. Кинилэр истэригэр Айхал Матвеев. Кини аан бастакытын «Пушкинскай каартаны» туһанна.
Айхал Матвеев, Дьокуускай куорат 17 №-дээх оскуолатын 9-в кылааһын үөрэнээччитэ:
— Биһиги барыта уон икки оҕо буолан тыйаатырга сырыттыбыт. Испиктээкили бары үөрэ-көтө, дуоһуйа көрдүбүт. Артыыстар оруолларын итэҕэтиилээхтик толороллорун сөхтүбүт. Артыыстар олус түргэнник уобараска киирэн, наһаа дьиҥнээхтик оонньоотулар.
Мин «Пушкинскай каартаны» бу соторутааҕыта, сэтинньи 15 күнүгэр, ылбытым. Бэйэм госуслуга саайтыгар регистрацияны ааһан оҥотторбутум. Түргэн эбит. «Пушкинскай каарта» оҕолорго наһаа туһалаах уонна абыраллаах дии саныыбын, чуолаан тыйаатыры, мусуойдары сөбүлүүр оҕолорго. Бииргэ үөрэнэр оҕолорум бары оҥотторуохтара дии саныыбын.
Санатан этэр эбит буоллахха, «Пушкинскай каартаны» 14-тэн 22-гэр диэри саастаах эдэр дьон ылыахтарын сөп. Кинилэр каарталарыгар үстүү тыһыынча харчы киирэр, ону ахсынньы 31 күнүгэр диэри туһаныахтаахтар. Аныгыс харчы саҥа сылтан саҥаттан түһэр. Бу бырагыраама Арассыыйа 85 куоратын барытын хапта, Саха сиригэр бырайыакка Пушкин аатынан нуучча драматическай тыйаатыра, Судаарыстыбаннай филармония, «Россия — мин историям» түмэл, Национальнай уруһуй түмэлэ, Опера уонна балет тыйаатыра, Үүнэр көлүөнэ тыйаатыра уо.д.а. киирдилэр.
Суруйда Анна СЛЕПЦОВА.