Оскуола дириэктэрэ Иванна Шишигина оскуола тэрээһиннэрэ уратытык, оҕолор интэриэстэрин тардар гына ыытылларыгар улахан болҕомтотун уурар. Тэрээһин үлэтин ыытарга уопуттаах буолан өрүү сонун идеялардаах, көрүүлэрдээх буолар.
Бу да сырыыга, Дойду үрдүнэн Пионерия өрөгөйдөөх үбүлүөйүн, Е.А. Шишигин аатынан Сатаҕай орто оскуолата бэрт сонуннук, тэрээһиннээхтик, өрө көтөҕүллүүлээхтик көрүстэ. Ааспыт кэмнэри санатар, история кэрэ кэмнэрин кэрэһэлиир оскуола урукку пионерскай олоҕун туһунан хаартысканан быыстапка тэрилиннэ. Эрдэттэн бэлэмнэммит фотозона турда. Кэнчээри ыччакка умнуллубат өйдөбүлү иҥэрэр, пионер диэн кимин сырдатар үөрүүлээх линейка буолла. Учууталлар пионерскай хаалтыс, пилотка кэтэн кэлэн, бырааһынньык суолтатын арыйдылар. Пионерскай ырыа-тойук доҕуһуоллаах ол кэми санаан ыллыбыт.
Ыҥырыылаах ыалдьыппыт педагогическай үлэ бэтэрээнэ, Сатаҕай орто оскуолатыгар өр сыл пионер-баһаатайынан үлэлээбит Лукина Анастасия Николаевна кэлэн үөрэнээччилэргэ эҕэрдэ тылын тиэртэ, Сатаҕай оскуолатыгар пионерия хайдах үлэлээн ааспытын сырдатта. Бу үөрүүлээх күҥҥэ «Утум» баһаатайдар этэрээттэрин саҥа чилиэннэрэ талылыннылар. Хаалтыс баанан сүргэлэрэ көтөҕүлүннэ.
Эбиэт кэннэ үгэскэ кубулуйбут слет буолла. Үөрэнээччилэр 4 хамаандаҕа арахсан байыаннай-спортивнай оонньууга, хаһыат таһаарыыга күрэхтэстилэр. Көрү-нары оройуттан тутан, сибиэһэй салгыҥҥа бириэмэни туһалаахтык атааран, астынан тарҕастылар.
Ольга Соловьева, дириэктэри иитэр үлэҕэ солбуйааччы