Алын кылаас оҕолоро «Саһыл уонна куобах» остуоруйаны туруордулар. Кэрэчээн мааскалаах кыра артыыстарбыт ыллаатылар, үҥкүүлээтилэр. Остуоруйаны ситиһиилээхтик туруоран төрөппүттэрин, учууталлары, кэлбит ыалдьыттары остуоруйа алыптаах эйгэтигэр күүлэйдэттилэр. Остуоруйа түмүгэр куруук буоларын курдук сымыйаны-куһаҕаны кырдьык-үчүгэй кыайда. Тымныы оҕонньор сиэнэ Хаарчаана кыыстыын кэлэн бэлэх арааһын оҕолорго туттартаата, оҕолору кытта тэҥҥэ хороводтаһан, оонньоон, кэлэр сылга элбэх ситиһиилэри баҕаран барда.
Бу үөрэх сылын сыл аҥарыгар наукаҕа, араас олимпиадаларга, күрэхтэргэ миэстэлэспит оҕолорго директорбыт Валентина Герасимовна Павлова грамота, диплом туттартаата. Орто уонна улахан кылаас оҕолоро Саха-КВН күрэххэ күрэхтэстилэр. КВН маннык түһүмэхтэринэн барда: бэйэни билиһиннэрии (визитка); ырыа күрэҕэ; миниатюралар; боппуруоска эппиэттээһин; киинэни эбэтэр мультигы бэйэ саҥатынан саҥардыы.
Бу 5 түһүмэҕи хамаандалар бары наһаа үчүгэйдик толордулар. Көрөөччүлэр күлүүлэрэ, ытыстарын тыаһа саала иһигэр өрө хабылла олордо. Күрэх аата күрэх. 5 киһилээх дьүүллүүр сүбэ түмүгүнэн анал ааттар, кылаастарынан миэстэлэр үллэһиннилэр. Дьүүллүүр сүбэҕэ нэһилиэкпит эдэр ыччата, бэйэлэрэ эмиэ көр-күлүү киэһэлэрин көхтөөх кыттааччылара кытыннылар. Ол курдук анал ааттарга тигистилэр: «Бастыҥ хапытаан» — Семен Неустроев, 9 кылаас үөрэнээччитэ; «Бастыҥ КВНщик» — Георгий Саввинов, 7 кылаас; «Бастыҥ күллэрээччи» — Коля Винокуров Коля, 7 кылаас; «Бастыҥ нууччалыы дикция» — 5 кылаас үөрэнээччилэрэ; «Бастыҥ үҥкүүһүттэр» — 6 кылаас үөрэнээччилэрэ.
Миэстэлэринэн: 8-9 кылаастар холбоһуктаах хамаандалара 3 миэстэ буолан Верхоянскай куорат «Тымныы чыпчаала» музейыгар барар путевка туттулар; иккис миэстэ буолбут 7 кылаастар оройуоммут сыантырыгар Баатаҕай бөһүөлэгэр кинотеатрга киинэ көрөр чиэскэ ыбыстылар. Онтон биһиги 10-11 кылаас холбоһуктаах хамаандабыт 1 миэстэ буолан Адыаччы нэһилиэгин оскуолатын палентиологическай музейын көрө барар путевка туттубут. Ону таһынан кылаастар икки ардыларыгар «Ретро Новый год» хаартыска түһүүтүн зоналарыгар күрэххэ 3 миэстэни 5, 7 кылаастар үллэһиннилэр; 2 миэстэ 10 кылаас буолла; бочуоттаах 1 миэстэни 6 уонна 8-9 кылаастар ыллылар. Бу курдук сарсыардаттан киэһээҥҥэ диэри оскуолабыт иһэ саҥа дьыл тыынынан өрө ньиргийэ олордо.
Буфеппытыгар удамыр сыанаҕа араас минньигэс аһынан оскуолабыт үлэһиттэрэ ас астаан аһаттылар, кылаастарынан араас оонньуулар, сыал ытыыта, лотерея о.д.а буоллулар. Саҥа дьыллааҕы киэһэбит «Бары бииргэ» ырыа оһуохайынан түмүктэннэ.
Илларион Старостин, 10 кылаас, «Аартык» эдкора.
Саина Данилова, 8 кылаас хаартыскаҕа түһэриитэ.
Арыылаах, Дьааҥы.