Оскуолабыт социальнай-психологическай сулууспата бэрт таһаарыылаахтык үлэлиир. Соцпедагог — Львова Сардана Львовна, психолог — Герасимова Аэлита Семеновна. Билигин сайдыы балысхан түргэн кэмигэр таах олорон хаалбакка, хас биирдии үөрэнээччи уйулҕата доруобай буоларын, олоххо бэлэмнээх дьон тахсалларын туһугар үлэлэрин араас хайысханан ыыталлар. Олортон биирдэстэрэ доруобуйалара хааччахтаах оҕолору кытта үлэ. Оҕолор бэйэлэрин сыаналаныылара үрдээтин диэн араас таһымнаах күрэхтэргэ көҕүлээн кытыннараллар.
Ол курдук, “Күүстээхтэр, түргэннэр, сымсалар» диэн ааттаах доруобуйаларыгар хааччаахтаах оҕолор ортолоругар улуус иһинэн спартакиада буолла.
Манна 10-с кылаас уолаттара Ангаскеев Айаал, Трофимов Федя кытыннылар. Айаал дартс көрүҥҥэ 3 миэстэ, Федя мас тардыһыытыгар уонна остуол тенниһигэр бочуоттаах 3-с миэстэҕэ тигистэ.
Уолаттар тэҥнээхтэрин кытта илин-кэлин түсүһэн, кыахтарын көрдөрөн түөстэригэр мэтээллээх кэллилэр. Кинилэри физкультура учууталын Андреев Николай Игнатьевич эрчийэн кытыннарда.
Итини таһынан, Барахов аатынан Үөһээ Бүлүү орто оскуолата Ийэ сылыгар анаан ыыппыт уруһуй уонна уус-уран оҥоһук өрөспүүбүлүкэтээҕи быыстапка-күрэҕэр бу уолаттар кыттан, 1 уонна 2 степеннээх дипломнарынан наҕараадаланнылар.
Федялаах Айаал күн күбэй ийэлэрин мэтириэтин маска түһэрэн, биирэ кыһан, биирэ уотунан сиэтэн, үүт-үкчү оҥордулар. Кинилэргэ уруһуй, технология учууталлара Евсеев Аркадий Петрович, Васильев Олен Григорьевич ыйан-кэрдэн биэрдилэр.
Мантан оскуола социальнай-психологическай сулууспата атын учууталлары кытта ыкса ситимнээх үлэлиирэ көһүннэ. Уолаттар, ити курдук туохтан да толлубакка иннигит диэки хардыылаан иһиҥ!
«Кустук» пресс-киин эдкордара.
Күүкэй, Сунтаар.