Төрөөбүт тыл уонна сурук-бичик күнүнэн истиҥ эҕэрдэ! Ийэбит үүтүттэн иҥэриммит төрүт тылбытынан санаабытын сайаҕастык этэн, төрүт тылбыт симэлийэн сүтэн хаалбатыгар туруулаһыаҕыҥ, кэнчээри ыччаттарбытын сахалыы өйгө-санааҕа иитиэҕиҥ, саха кутун-сүрүн иҥэриэҕиҥ!
Ийэ тыл, сурук-бичик күнүгэр аналлаах тэрээһиннэр оскуола, улуус ахсын буола тураллар. Тыл хараҥа күүстэри үтэйэр, ыарыыны эмтиир-домнуур кыахтаах аптаах-күүстээх. “Амма Алгыс” — дьоҥҥо үтүөнү баҕаран, олох араас түбэлтэлэригэр, көстүүлэригэр үтүө түмүгү көрдөһөн айыыларга, иччилэргэ сүгүрүйэн, махтанан тыл этии. Амма улууһун Бөтүн оскуолатыгар Саха тылын уонна литературатын нэдиэлэтин чэрчитинэн олохтоох энтузиаст — краевед Нестерев Алексей Михайлович сыт таһааран, алгыс анаата.
Дьааҥы улууһун Баатаҕай орто оскуолатыгар Төрөөбүт тыл, сурук-бичик күнүгэр аналлаах тэрээһин иккис күнүгэр улуус оскуолаларыттан саха тылын уонна литературатын учууталлар мустан, Неустроева Юнна Павловна ааптар быһыытынан ыытар семинарыгар сылдьан, уопуттаах учуутал үлэтин-хамнаһын кытта билистилэр. Маны таһынан, саха тылыгар аналлаах араас тэрээһиннэр, кылаас чаастара буолаллар.
Уус-Алдаҥҥа улуустааҕы «Төрөөбүт тыл түмэр түһүлгэтэ» күрэх буолан ааста. Мүрү 1 №-дээх оскуолатын чиэһин Долун Жирков, Саян Егоров, Айна Гоголева, Алина Лебедева, Маша Попова, Женя Слепцова көмүскээтилэр. Оҕолору бэлэмнээтилэр саха тылын учууталлара В.И. Аммосова, Л.В. Аргунова, М.Д. Местникова, Г.Е. Мигалкина. Г.Н.Иванова- Айтыына айымньыларынан «Өбүгэ үгэһин утумнаан» оскуолалар 6 кылаас үөрэнээччилэрин икки ардыларыгар тыл уонна өркөн өй оонньуута ыытылынна. Манна библиотекарь Л.В.Бурцева салалтатынан Алиса Егорова, Күннэй Данилова, Артем Олесов, Евгения Колесова, Дайаана Степанова, Надя Алексеева кыттааччылаах Мүрү 1 №-дээх оскуолата бастаата, иккис Мүрү 2 №-дээх оскуолата, үһүс “Уолан” гимназия оҕолоро буоллулар.