Орто Халыма улууһун Өлөөкө-Күөлүттэн 8 кылаас үөрэнээччитэ, «Эдэр корреспондент» пост эдкора Эрнст Ноговицын күһүҥҥү сынньалаҥҥа балыктаан, каникулун туһалаахтык атаарбытын туһунан суруйар.
Мин саамай сөбүлүүр кэмим — күһүн. Тоҕо диэтэххэ, бу кэмҥэ күөл мууһа тоҥон, илим кэмэ, балыктааһын саҕаланар. Бу кэми киһи бөҕө кэтэһэр. Сарсыардааҥы дьыбарга муус алларан, ойбонтон мууһун сүүрдэн, илим көрөр олус умсугутуулаах буолар.
Быйыл биһиги бөһүөлэктэн 14 көс тэйиччи баар Омук күөлэ диэн оскуола базатыгар Дмитрий Васильевич Явловский салайааччылаах аҕыс буолан, балыктаатыбыт. Уолаттар бары иккилии илимнээх барбыппыт. Булчут сиэрин-туомун тутуһан, аал уоппутун аһатан, маспытын бэлэмнээн, ойбон алларан, илиммитин үтэн бастакы күммүтүн атаарбыппыт. Иккис күммүтүгэр сарсыардаттан илимнэрбитин көрүммүппүт. Эбэбит барахсан көмүс хатырыктааҕынан күндүлээн, олус үөрбүппүт. Урукку сылларга холоотоххо, балык аҕыйах сыла да буоллар, санаабытын түһэрбэтибит. Тоҕо диэтэххэ, булчут мыыныа суохтаах.
Илим көрүнэн баран, чугастааҕы талахтарга курупааскыга туһах, куобахха хапкаан иитэбит. Өссө Дмитрий Васильевич киискэ төрүөт уурарга үөрэппитэ. Тыаҕа көҥдөй маһы булан, хайдах сатабыллаахтык мэҥиэ уурары биллибит. Оттон киэһэтин базабытыгар оһох отто-отто, остуол тула олорон саахыматтаан, дуобаттаан, арааһы кэпсэтэн, таабырын таайсан аралдьыйабыт.
Күһүҥҥү сынньалаҥмытын сылын аайы оскуола базатыгар атаарабыт, онон балыктааһын, булт үөрүйэхтэригэр үөрэнэбит. Уолаттар уочаратынан дьуһуурунайдыыбыт: ас астаан, иһит сууйан, уу баһан, мас хайытан, оһох оттон.
Саамай хомойорбут диэн, бу сынньалаҥ олус кылгас кэм, биир эрэ нэдиэлэ. Биир нэдиэлэлээх сынньалаҥмыттан мин дьиэбэр уонча балыктаах, алта сордоҥноох, икки куобахтаах кэлэн дьоммун үөртүм. Эһиил эмиэ барарбын күүтэбин.