Быйыл мин өрөспүүбүлүкэбитигэр үгэс буолбут Ил Дархан Саҥа Дьыллааҕы харыйатыгар ыалдьыттыыр үрдүк чиэскэ тигистим. Сунтаар улууһуттан уопсайа 28 оҕо буолан ахсынньы 21 күнүгэр автобуһунан Дьокуускай куоракка айаммытыгар туруммуппут. Аара Бүлүү куорат 1 нүөмэрдээх оскуолатыгар ыалдьыттаан, хонон, сынньанан ааспыппыт. Олохпор бастакытын бу курдук оҕолору кытта автобуһунан айаннаабыт буоламмын дьикти баҕайы курдук этэ.
Дьокуускайга тиийэн бараммыт «Республиканская специальная школа-интернат для неслыщащих» диэн оскуолаҕа Сунтаар, Ньурба, Бүлүү, Үөһээ Бүлүү, Горнай, Амма улууһуттан кэлбит оҕолор түспүппүт (200 тахса оҕо). Олус да үчүгэй этэ: көрсүө-сэмэй үлэһиттэр, ыраас уонна сылаас хостор, минньигэс, тотоойу ас. Хас биирдии күммүт түбүктээхтик уонна түргэнник да ааһара: спортивнай күрэстэр, викториналар, форумнар, кэнсиэрдэр, уоттаах күөстээх үҥкүү-битии буолар этэ.
Ол курдук, «Мы — будущее России» диэн 15 төгүлүн ыытыллар форумҥа сылдьыбыппыт. Онно министрдары кытта оҕолор РДШ инникитин хайдах сайдыан, ханнык ньымалары эбии киллэриэххэ сөбүн кэпсэппиттэрэ. Уонна оттон кэтэһиилээх күммүт ахсынньы 24 күнүгэр буолбута. Хара сарсыардаттан бэлэмнэнии, киэргэнии саҕаламмыта. Онтон автобустарга олорон ГАИ арыаллаах циркаҕа барбыппыт. Ол баран истэхпитинэ дьон хаартыскаҕа түһэрэр, видеоҕа устар этэ. Санаабытыгар сулустар курдук санаммыппыт. Циркаҕа «Царевна лягушка» диэн остуоруйа представлениетын көрбүппүт. Акробаттар хайдах курдук тутталларын-хаптылларын, кырасыабайдык уонна чэпчэкитик ыарахан баҕайы хамсаныылары оҥороллорун көрөн сөхпүппүт аҕай уонна биир акробат алҕас үөһээттэн сууллан түһэн төбөтүн эчэппитигэр куттаммыппыт.
Урут мин Ил Дарханы күөх экран нөҥүө эрэ көрөр буоллахпына, илэ харахпынан көрөн баран долгуйбутум. Харчы бэлэҕин иһин махтанабын уонна ол харчым үөрэхпэр туһа, көмө буолуо диэн эрэнэбин. Бу тэрээһиҥҥэ сылдьан мин олус диэн элбэх эргиччи талааннаах, өйдөөх, инники олохторугар чопчу сыаллаах-соруктаах, ураты олоҕу көрүүлээх, өрөспүүбүлүкэбит, дойдубут чаҕылхай, чулуу оҕолорун кытта билистим. Махталбын тириэрдиэм этэ биһигини сирдии, арыаллыы сылдьыбыт куратордарбытыгар Сааскылаана Александровнаҕа уонна Дьулустаан Николаевичка, оскуолам коллективыгар!
Олохпор умнуллубат, бэлиэ түгэн ааста! Билигин санаатахха кэрэ түүл курдук…
Анжелика Егорова, 11 кылаас, «Кустук» пресс-киин, Күүкэй, Сунтаар улууһа.