Үөрэҕи-билиини иҥэрбит
Иккис дьиэбит тэҥэ
Оскуолабыт барахсан
Үүнэ-сайда туруохтун!
Сибэкки тутуурдаах, үөрүү-көтүү мичээрдээх оскуола боруогар үктэммит чаҕылхай сырдык күммүн өйдөөн-санаан кэлэбин… Билигин көтө үөрэммит чыычаахтар курдук, төрөөбүт уйабытыттан көтөр кэммит тиийэн кэллэ.
Учууталларбыт – иккис төрөппүттэрбит. Кинилэр биһигини оҕолорун курдук бүөбэйдээн, билиигэ-көрүүгэ уһуйан, кэрэттэн-кэрэҕэ сирдээн, кичэйэн үөрэтэн, олох киэҥ аартыгар үктэннэрдилэр. Аан маҥнайгы арыйыыбыт оскуолаттан саҕаланар. Оскуолам билии биэрбит кыһам буолар.
Учууталларбыт хас биирдии оҕону кытта биир тыл булан, уруок ахсын санааларын, дууһаларын ууран туран үөрэтэллэр. Билиҥҥи бириэмэҕэ билиитэ суох киһи ханнык да эйгэни баһылаабат. Ол иһин учууталларбыт хаачыстыбалаах билиини биэрэр туһугар үлэлииллэр.
Олох киэҥ аартыгар үктэнээри туран, махтаныам этэ, ийэлии эйэҕэс майгылаах, сырдыкка, кэрэҕэ, үтүөҕэ угуйбут учуутал доҕорбор! Биһиги өйбүтүгэр куруук баар буолуо оскуолабыт барахсан ураты сылааc эйгэтэ, умнуллубат күннэрэ…
Маша Аммосова,
Хамаҕатта саха-француз лиссиэйэ, Нам.