Үһүс нүөмэрдээх Чебурашка оҕо сайдар киинигэр «Суолга сэрэхтээх буолуу» диэн күһүн, саас сэрэтэр үлэ ыытыллар. Билиҥҥи кэмҥэ техника арааһа элбээбитинэн, оҕо оскуолаҕа киирэригэр суол быраабылатын, дэриэбинэ, куорат суолларын уратыларын, суолга сэрэхтээх буолууну билиэхтээх.
Оҕо улахан киһитэ суох суолга сылдьыбатын, сатыы киһи сылдьар суолунан эрэ сылдьыахтааҕын, тротуар уҥа өттүн тутуһан, уулуссаҕа ыксаабакка, бытааннык хаамыллыахтааҕын билиэхтээхтэр.
Детсадка иитээччилэр төрөппүтү кытта көмөлөөн оҕо сылдьар эйгэтин бэрийэллэр. Ол эйгэлэргэ оҕолор оруоллаах оонньуулары «Мин суопппарбын», «Светофор уонна сатыы киһи», «Мин транспорым» уонна да атын оонньуулары сөбүлүүллэр. Ону таһынан, оҕолорго суол быраабылатын билэллэрин чиҥэтэн дьарыктары, аралдьыйыылары «Мин күөх светофорум», «Зебра — сатыы туоруур суол», «Мин массыына ыытабын» былааннан ыыталлар.
Бу нэдиэлэҕэ ГАИ сотруднига «Чебурашка» детсадка сылдьан, оҕолорго суол быраабылатын билиһиннэрэн бэсиэдэ ыытта, кэпсээтэ, көрдөрдө. Оҕолор суолга сэрэхтээх буолалларыгар иитии үлэтэ төрөппүтү кытта ыкса ситимнээхтик араас ньыманан барар. Бэсиэдэ, анкета, викторина «Ток-шоу» уонна да атыны ыыталлар.
Анисия СЕМЕНОВА, медиа-киин эдкора, Сунтаар бастакы нүөмэрдээх оскуолата.