Оҕо айымньытын дыбарыаһыгар Саха сирин пионериятын 95 сылыгар аналлаах «Россиятааҕы оҕо хамсааһынын кытта үөрэнэбит, доҕордоһобут, сайдабыт» фестиваль буолан ааста. Өрөспүүбүлүкэ араас муннуктарыттан саамай көхтөөх 350 оҕо мустан, икки күн устата араас тэрээһиҥҥэ, куонкуруска, көрсүһүүгэ кытынна.
Түмүктүүр тэрээһиҥҥэ сыанаҕа горннарын үрэн, барабааннарын охсон, аалай хаалтыстаах пионердар стройунан хааман тахсыбыттарын саалаҕа толору мустубут көрөөччүлэр ытыстарын дохсун тыаһынан көрүстүлэр.
СӨ Үөрэххэ уонна наукаҕа министиэристибэтин иитэр үлэҕэ отделын начаалынньыга О.А. Яшина: “Мин эмиэ кыһыл хаалтыстаах пионер, дохсун санаалаах хомсомуол этим. Билиҥҥи оҕо хамсааһына урукку пионерия үгэстэрин илдьэ сылдьара олус улахан суолталаах”, – диэн эттэ уонна Ил Түмэн Бочуотунай грамоталарын педагогическай этэрээттэр хамсааһыннарын сайдыытыгар кылааттарын иһин Дайаана Васильеваҕа уонна Алексей Павловка туттарда.
SONY DSC
СӨ Ыччат дьыалатыгар уонна социальнай коммуникация миниистирин солбуйааччы Л.Н. Клюкина бастыҥнары түөскэ иилиллэр “СӨ оҕо хамсааһынын сайдыытыгар кылаатын иһин” Бэлиэнэн наҕараадалаата. Кырдьык даҕаны, билиҥҥи кэмҥэ оҕону кытта үлэлиир олус уустук. Н.Н. Протопопова (Чернышевскай оскуолата, Бүлүү), З.С. Николаева (Сүлэ оскуолата, Ньурба), В.П. Слепцова (Бахсы, Чурапчы), Р.Н. Горохова (Хаһааччыйа, Усуйаана) оҕо аймахха ураты сыһыаннарынан, түмэр дьоҕурдарынан сөптөөх наҕараадаларын ыллылар.
SONY DSC
Лиидэр оҕолор эмиэ наҕараадата суох хаалбатылар. “Дьулуур” түөскэ иилиллэр Бэлиэни Семен Сивцев (Хатыҥ Арыы, Нам), Кристина Ерий (Серебряный Бор, Нерюнгри), Вероника Александрова (Жатай, Дьокуускай), Анастасия Захарова (Ытык Күөл, Таатта), Антонина Лукина (Хадаар, Чурапчы) туттулар.
Тэрээһин чэрчитинэн ыытыллыбыт куонкурустар түмүктэринэн “РДШ бастыҥ хамаандата” ааты “Республика лицей” (Алданнааҕы лиссиэй) түмсүү ылла. II уонна III бириистээх миэстэҕэ “Содружество” (Нерюнгри) уонна “Сокол” (Мохсоҕоллоох, Хаҥалас) түмсүүлэрэ таҕыстылар.
“Саамай түмсүүлээх хамаанданан” Нам улууһун Хатыҥ Арыы оскуолатын “Ылдьаа ыччаттара” буоллулар.
Кыайыылаахтар бары өйдөбүнньүк бэлэхтэринэн уонна “Океан” лааҕырга путевкаларынан наҕараадаланнылар.
Чахчы да, маннык уоттаах-төлөннөөх, элбэх саҥа идиэйэлээх, умайа сылдьар харахтаах ыччаттаах буоллахпытына, биһиги дойдубут сайдыа-үүнүө, инникигэ эрэл- лээх буолуо!
SONY DSC
«БРИГАНТИНА»
Бу тэрээһиҥҥэ олорон иһиттэххэ, Дьокуускай куорат Жатайын “Бригантина” оҕо уопсастыбаннай түмсүүтүн аата элбэхтик ааттанна. Бригантиналар сыанаҕа тахсан, бэйэлэрин олус үчүгэйдик билиһиннэрдилэр. Бу түмсүүгэ 2016 сыллаахтан «Содружество» (салайааччы В.В. Чипизубова), «Орбита» (сал. Е.А. Киуру), «Колибри» (сал. А.А. Скрябина) тэрилтэлэр киирэн, 500 оҕону түмэллэр. “Бригантина” чилиэннэрэ, төһө кыайалларынан, төрөөбүт төрүт түөлбэлэрин киэргэтэ-тупсара сатыыллар. Оҕолор бырайыактара оскуолаттан саҕалаан, бүтүн бөһүөлэк барыта кыттар дьыалатыгар кубулуйар: уопсай дьиэлэр олбуордарын ыраастааһын, кырдьаҕастары көрүү-истии, кыаммат, инбэлиит дьоҥҥо көмө, айылҕа харыстабыла…
Жатай оҕолоро «Министр» дьыалабыай оонньууну, «Салют, пионерия!» фестивалы, «Снежный барс» байыаннай-спортивнай оонньууну, о.д.а. тэрээһиннэри көтүппэттэр.
Бастыҥ лиидэрдэр “Дьулуур” түөскэ иилиллэр Бэлиэнэн наҕараадаламмыттар: Лена Васильева (2015 с.), Яна Медведева (2016 с.), Дима Баранов (2018 с.), Эльмира Алероева (2018 с.). Бу тэрээһиҥҥэ итинник Бэлиэни Вероника Александрова тутта. “Бригантина” салайааччыта Алена Анатольевна Скрябина СӨ Үөрэҕин уонна наукатын министиэристибэтин Махтал суругунан бэлиэтэннэ.
Бригантиналар “Ил Дархан сэттэ сорудаҕа” марафоҥҥа, “Эдкордар – бөрүө рыцардара” форумҥа, “Саха сирин эдэр лиидэрэ” куон- куруска, баһаатайдар, волонтердар күрэхтэригэр, кэмпириэнсийэлэргэ өрүү Гран-при уонна бириистээх миэстэлэр хаһаайыннара буолаллар.
Бүтүн Россияҕа көхтөөхтөр
Ньургуйаана Владимировна МАКАРОВА, Россия үөрэнээччилэрин хамсааһынын Саха сиринээҕи координатора:
– Саха сиринээҕи салаа бэйэтэ туспа атрибутикалаах, түөскэ иилиллэр бэлиэлээх. 8-17 саастаах оҕолору түмэр. 2018 сыл сэтинньи ыйынааҕы көрдөрүүтүнэн биһиги өрөспүүбүлүкэбитигэр 783 оҕо уопсастыбаннай түмсүүтэ үлэлиир. Манна уопсайа 79265 оҕо киирэр. Быйыл бүтүн улууһунан Россиятааҕы хамсааһыҥҥа Таатта, Хаҥалас, Нам, Ленскэй, Чурапчы, Мэҥэ Хаҥалас, Үөһээ Бүлүү, Дьааҥы, Эбээн Бытантай, Абый, Амма уонна Жатай оскуолата киирдилэр.
SONY DSC
Оҕолору кытта 125 баһаатай, 205 педагог-организатор, 272 дириэктэри иитэр үлэҕэ солбуйааччы уонна 252 эбии үөрэхтээһин педагогтара дьарыктаналлар.
“Пилотнай” оскуолаларынан Дьокуускай 7 №-дээх, Сунтаар 1 №-дээх, Нерюнгри 2 №-дээх, Уус Алдан Лөгөйүн, Нам Хатыҥ Арыытын, Усуйаана Хаһааччыйатын, Булуҥ Быковскайын, Дьокуускай таһынааҕы Кангалас, Мэҥэ Хаҥалас Майатын В. Ларионов аатынан оскуолалара буолаллар.
Россиятааҕы хамсааһын буолан, лиидэр оҕолор Россия араас куораттарыгар ыытыллар тэрээһиннэргэ көхтөөхтүк кытталлар, куонкурустарга миэстэлэһэллэр.
“Юнармия” байыаннай-патриотическай хамсааһын, эдэр экологтар, кыраайы үөрэтээччилэр, волонтердар, медиа хайысхаларынан үлэ күүскэ барар.
Сыл ахсын оҕо гражданскай форумугар лиидэрдэр мустан, сайдар кэскиллэрин торумнууллар.
Таисия АЛЕКСЕЕВА.