1970 сыллаахха Акана нэhилиэгэр Өктөөп өрөбөлүүссүйэтин улуу сирдьитэ В.И. Ленин 100 сааhын көрсө «кэм-кэрдии капсулата» («капсула времени») өйдөбүнньүк-пааматынньык үөрүүлээх быhыыга-майгыга туруоруллубута. Бу пааматынньык иhигэр нэhилиэк историятын кэпсиир хаартыскалары, нэhилиэк олохтоохторун кэс тыллара уһуллубут магнитофон лиэнтэлэрин укпуттар.
Соторутааҕыта, балаҕан ыйын 3 күнүгэр, В.И.Ленин 150 сааhын көрсө нэhилиэкпитигэр 50 сыл анараа өттүгэр угуллубут карсуланы арыйыы сиэрэ-туома буолла.
Тэрээhиҥҥэ нэhилиэк ытык кырдьаҕастара,тэрилтэ салайааччылара, эдэр ыччат, пионерия бэтэрээннэрэ, «Дьулус» оҕо түмсүүтүн лидердэрэ кыттыыны ыллылар.
Пааматынньыгы арыйыы «Дьулус» оҕо түмсүүтүн уонна бэтэрээн-пионердар этэрээттэрин хамандыырдара нэhилиэк баhылыгар Е.М.Семеновка рапорт туттарыыларыттан саҕаланна. Рапорт кэнниттэн Норуот эмчиттэрин ассоциациятын чилиэнэ, алгысчыт Алиса Михайловна алҕаата.
Тэрээhин долгутуулаах түгэнинэн капсуланы арыйыы буолла. Чкалов нэhилиэгин ытык кырдьаҕаhа, үлэ бэтэрээнэ Ф.Ф.Бускаров, Акана нэhилиэгэр өр сылга баhылыктаабыт Н.В.Николаев пааматынньыкка угуллубут капсуланы ылан, нэhилиэк баhылыгар Е.М. Семеновка туттардылар.
Икки капсула иккиэн олус кытаанахтык, туох даҕаны өтөн киирбэт гына хаачыстыбалаахтык хаппахтаммыттар, сабыллыбыттар эбит.
Тэрээhиҥҥэ мустубут ыалдьыттар ол кэми ахтан үтүө тылынан ахтан-санаан аастылар. Көлүөнэнэн хаартыскаҕа түhэн, бу улахан суолталаах тэрээһини үйэтитии буолла.
Ааптар: Святослав Торохов, эдкор.