Намнааҕы техникум “Мастер общестроительных работ” үөрэххэ ыҥырар. Манна IX кылаас кэнниттэн туттарсыахха сөп. Үөрэнии болдьоҕо — 2 сыл 10 ый.
«Тутуу маастара» идэни баһылаабыт дьон тутуу эйгэтигэр арматура баайааччы, бетонщик, таас дьиэни тутааччы буолаллар. Техникум выпускниктара производственнай быраактыкаларын улахан тутуу тэрилтэлэригэр ааһаллар. Холобур, Намнааҕы техникум “Нам-Строй” тутуу тэрилтэтин кытта хардарыта дуогабардаах.
Тутааччы орто хамнаһа – 35-40 тыһыынча солкуобай. Үлэлээн, уопутуран, разряд ылан истэхтэрин аайы, үрдээн иһэр.
Үөрэх туһунан Намнааҕы техникум производственнай маастара Мичил Борисович Герасимов кэпсиир:
— Бэйэм сварщик идэлээхпин. Техникумҥа сварщиктар уонна тутааччылар бөлөхтөрүгэр үөрэтии хайысхалаах быраактыканы ыытабын. Ону таһынан, 2019 сыллаахха туттарсан киирбит “Мастер общестроительных работ” идэ устудьуоннарыгар салайааччы буолабын.”
Тутааччы тугу билиэхтээҕий, сатыахтааҕый?
— Бу үөрэх хайысхата элбэх. Чопчу биһиги үөрэхпитигэр монтаж уонна сварка үлэлэрин үөрэтэбит (“Монтажник по монтажу стальных и железобетонных конструкций” уонна “Электросварщик ручной сварки”). Бастатан туран, каркаснай эбийиэктэри сыбааркалыыр, таҥар, буолуохтаахтар. Идэлэрэ үһүс разрядтаах. Быраактыкаларын иккис куурустан Намҥа тутуу тэрилтэлэригэр саҥа таас дьиэлэри тутууга ааһаллар. Бастакы кууруска, билсиһии быһыытынан, тутуу үлэтин үөрэтэллэр.
— Үлэ буолан баран үчүгэй да, ыарахан да өрүттээх буолар. Аныгы тутааччыга, нууччалыы эттэххэ, билии таһыма (квалификация) уонна сатабыл (компетенция) баар буолуохтаах. Билии уонна сатабыл – тус туспа өйдөбүллэр. Элбэҕи билэр, биллэн турар, үчүгэй. Монолиты уурары, холобур, крановщик теориятын билэр. Ол эрээри ылбыт билиини үлэҕэ сатаан туһанар дьон аҕыйах. Маннык үлэһиттэр былдьаһыкка сылдьаллар. Билигин баай уопуттаах, киэҥ билиилээх, кырааны салайар киһини булар уустук.
— Ситиһии өттүгэр киирдэххэ, биһиги устудьуоннарбыт региональнай WorldSkills күрэххэ “Сварочное дело” компетенцияларга бириистээх миэстэлээхтэр. Ону таһынан, үөрэх тэрилтэлэрин икки ардыларыгар, улуус, өрөспүүбүлүкэ таһымыгар ыытыллар спорт күрэхтэригэр кэккэ ситиһиилэрдээхпит.
Үөрэххэ туттарсааччыларга сүбэ
Ил Дархан Айсен Николаев этиитэ эдэр ыччакка анаан маннык эппитэ: «Бастатан туран, тутуу тохтуур кыаҕа суох, тохтоло суох бара турар. Онон үлэһит илии тиийбэт буолуон сөп. Билигин тутууга тас дойдуттан кэлэн үлэлииллэр, олор оннуларыгар устудьуоннар тахсыахтарын сөп диэн көрөбүн. Уонна олохтоохтору тутууга сыһыарыыны саҕалыахпыт”. Бу этии өрөспүүбүлүкэ ыччата тутуу эйгэтигэр көхтөөхтүк киирэн үлэлииригэр ыҥырыы буолар.
Ыарахантан чугуйбакка, иннин хоту баран иһиэххэ наада. Оччотугар барыта сатаныа, кыаллыа.
Ааптар: Павел Ильин.