Билии күнүгэр Нам улууһун Модут кэрэ айылҕалаах агрооскуолатыгар чаҕылыччы күн тыкта. Быйыл оскуола боруогун Лилия Васильевна Леонтьева салайааччылаах 18 оҕо оскуола боруогун атыллаата. Хаһан да умнуллубат, хаһан да хатыламмат күҥҥэ чоҕулуччу көрбүт харахтаах, кыракый суумка тутуурдаах кырачааттар Билии киэҥ аартыгар үктэннилэр.
Оскуола араас өҥнөөх шаригынан, кэрэчээн сибэккилэринэн симэнэн үөрэ-көтө көрүстэ. Сырдык, ыраас кылаастарга оргууй аҕай үктэнэн, ахтыспыт үөрэнээччилэр паарталарга олордулар.
Линейканы оскуола дириэктэрэ Михаил Егорович Новиков арыйда, оскуола үлэтин сырдатта, Билии күнүнэн үөрэнээччилэри, учууталлары, төрөппүттэри уонна ыалдьыттары эҕэрдэлээтэ.
Эҕэрдэҕэ кыттыһан бэйэлэрин сэмэй бэлэхтэрин оскуолабыт маҥнайгы выпускнига Ефим Ефимович Гоголев, Кэбээйи улууһун Таҥара оскуолатын 81 сыллаах выпустарын ааттарыттан Александра Гаврильевна Петрова маҥнайгы кылаастарга туттардылар.
Ыҥырыылаах ыалдьыппыт Константин Револьевич Нифонтов, АГАТУ проректорын эбээһинэһин толорооччу, “Мин маҥнайгы идэм” чэрчитинэн үөрэммит оҕолорбутугар “3 разрядтаах парикмахер” дипломнарын 11 кылаас үөрэнээччилэригэр Рая Винокуроваҕа, Лиана Охлопкова-Аргуноваҕа туттарда.
Агрооскуола буоламмыт сибиэһэй ынах этинэн миин, оҕуруот аһынан, итии үүттээх чэйинэн ыалдьыттарбытын күндүлээтибит, ирэ-хоро инники былааннары кэпсэттибит.
В.Н. Аммосова, дириэктэри иитэр үлэҕэ солбуйааччы,
Т.В. Петрова, төрүт култуура уонна саха тылын учуутала.