Уус-Алдан Бороҕонуттан төрүттээх билигин Өймөкөөн улууhун Томтор нэhилиэгин олохтооҕо Фекла Константиновна Сивцева Өймөкөөн улууhун норуот уус-уран оҥоһугун маастара, үөрэх эйгэтин ветерана, РФ уонна СӨ үөрэҕириитин туйгуна, «Учууталлар учууталлара» анал аат хаhаайына, талан ылбыт идэтигэр бэриниилээхтик, таптыыр дьарыгын өрө тутан айар аартыгынан айаннаабыт киhинэн буолар. Кини араас матырыйаалларынан көрүөхтэн кэрэ көстүүлээх элбэх үлэлэрдээх.
— Фекла Константиновна, хантан хааннааххытын, кимтэн кииннээххитин, баhаалыста, биhиэхэ сырдатыаххыт уонна кылгастык дьиэ-кэргэҥҥитин кытта билсиhиннэриэххит дуо?

— Мин 1950 сыллаахха Уус-Алдан улууhугар Бороҕоӊӊо күн сирин көрбүтүм. 9 оҕолоох ыал улахан оҕото этим.

— 1975 сыллаахха Сивцев Александр Иннокентьевичка кэргэн тахсыбытым. Түөрт оҕолоохпун. Улахан уолум, Юра, Намҥа олорор, музыкальнай оскуола директора, икки оҕолоох. Иккис уолум, Кеша, Үчүгэй, Томтор оскуолаларыгар уруhуй, труд учууталынан үлэлээбитэ. Үс оҕолоох. Кыра уолум Саша Томтор культура дьиэтигэр уот – тыас-уус операторынан үлэлиир. Биир оҕолоох. Кыыhым, Аанчык, худуоһунньук.
— Ханна үөрэммикитий? Үлэҕитин ханна саҕалаабыккытый?
— 1974 сыллаахха Намнааҕы педучилищены бүтэрэн баран Өймөкөөн Томторугар учууталынан 36 сыл үлэлээбитим. Уруһуй, труд, черчение учуутала этим.
— Иистэнньэҥ маҥнайгы тикпит таҥаһын, оҥоһугун хаһан даҕаны умнубат дииллэр. Онтон эн бастакы тикпит таҥаскын өйдүүгүн дуо?
— 5 кылааска үөрэнэ сылдьан халаат тикпиппин өйдүүбүн. Тимэҕин кнопка гыммыт этим, кэттэхпинэ аһыллан хаалар этэ. Ол иһин өйдөөн хаалбыппын.

— Норуот маастара» ааты хас сыллаахха ылбыккыный?
— 2014 сыллаахха «Өймөкөөн улууһун норуот маастара» аатын ылбытым.
— Эн төрүккэр иистэҥньэҥнэр, уустар бааллар этэ дуо?
— Аҕам, Бурнашев Константин Константинович, өттүнэн эбээм Сүөкүлэ туоһу тигэрэ үһү, оҥоһуктарын наар дьоҥҥо бэлэхтиир эбитэ үһү. Ийэм, Анна Дмитриевна Ховрова-Бурнашева, урукку таҥас-сап суох кэмигэр тоҕус оҕотун бэйэтэ тигэн-таҥыннаран улаатыннарбыта. Соннору, ыстааннары тигэрин өйдүүбүн. Ыһыахха бары биир дьүһүннээх былааччыйалаах, сэлээппэлээх буолар этибит.
— Саамай улахан үлэҥ?
— Арааһа, сахалыы сонум буолара буолуо. Хас да сыл тикпитим, сыл аайы уларытан, тупсаран иһэбин. Быйыл түүтүн кыһыл саһылынан уларытан биэрбитим.
— Саамай улахан ситиһииҥ?
— Саамай улахан ситиһиим «Отличник системы образования РФ» анал аатым буолар.



— Инники былааныҥ?
— Үүнэр 2025 сылга 75 сааспын туолабын, онно үлэлэрбин, оҥоһуктарбын түмэммин быыстапка оҥоруом. Сиэлинэн туох эмэ үлэни оҥороору толкуйдуу сылдьабын.
— Фекла Константиновна, истиҥ кэпсээниҥ иһин барҕа махтал!
Неустроева Кристина,
Н.М. Заболоцкай аатынан Томтор орто оскуолатын
10 кылааһын үөрэнээччитэ