Ахсынньы 20 күнүгэр Дьокуускай куоракка өрөспүүбүлүкэ туйгунтан туйгун бастыҥ үөрэнээччилэрэ Ил Дархан Харыйатыгар түмсэн аастылар. Бу биһиги өрөспүүбүлүкэбитигэр сылын аайы ыытыллар үтүө үгэс буолар.
Мин быйылгы тэрээһиҥҥэ «Кэскил» медиа-оскуола юнкорын быһыытынан сырдатыы үлэтигэр кыттар соруктаах сырыттым. Марфа уонна Сергей Расторгуевтар ааттарынан Саха Өрөспүүбүлүкэтин Государственнай циркатыгар оҕо аймах бөҕөтө мустубут. Бары олус үөрбүттэр.
Цирковой туруоруу кэнниттэн Саха Өрөспүүбүлүкэтин Ил Дархана Айсен Сергеевич Николаев эҕэрдэ тылын эттэ. Бу тэрээһин киниэхэ өрүү киэн туттуу санаатын үөскэтэрин туһунан өрө көтөҕүллэн туран бэлиэтээтэ.
— Биһиги өрөспүүбүлүкэбит инникилэрэ эһиги буолаҕыт. Мин эһигинэн киэн туттабын, — диэн эттэ Ил Дархан.
Айсен Сергеевич эппитин курдук, бүгүн биһиги дойдубут уустук кэмнэри көрсөн олорор. «Биһиги дойдубут көҥүлүн туһугар, аан дойду үрдүнэн мөлүйүөнүнэн ахсааннаах дьоннор дьоллоох олохторун туһугар туруулаһабыт. Эһиги ортоҕутугар олох, көҥүл иһин хорсун буойуттарбыт туруулаһаллар. Кинилэр ортолоругар бүгүн кэлэн олорор бочуоттаах ыалдьыттарбыт Арассыыйа Геройдара Андрей Григорьев, Филипп Евсеев бааллар. Сахалар курдук буойуттар аан дойдуга суохтар диэн дойдубут Президенин этиитин киэн тутта иһиттибит»,— диэн Айсен Сергеевич эттэ уонна биһиги, оҕолор, дойдубутун харыстыыр, таптыыр, Сахабыт сирэ, Арассыыйабыт сылтан сыл күүһүрэн иһэригэр баҕарда.
Айсен Сергеевич быйыл Арассыыйатааҕы олимпиадалар кыайыылаахтарын ахсааннара элбээбитин бэлиэтээтэ. Итинник элбэх кыайыылаахтар уонна призердар 16 сыл устата суохтар эбит.
— Оҕолорбут математикаҕа, информатикаҕа, физикаҕа уонна да атын предметтэргэ ЕГЭ-ни үчүгэйдик туттарар буолуллар. Онон инникигэ үчүгэй хамсааһыннар бааллар. Биһиги эһиэхэ үчүгэй буоларын туһугар барытын оҥоробут — үөрэх, култуура, спорт объектарын тутабыт. Бу барыта эһиги үчүгэйдик үөрэнэргит, элбэх билиини ылынаргыт, дойду патриоттара буолан тахсаргыт туһугар оҥоһуллар, — диэн эттэ.
Ил Дархан Харыйатыгар Айсен Сергеевич аттыгар Уус Майа улууһун Эльдикан нэһилиэгиттэн Ксения диэн кыыс олордо.
— Ксения оскуолатын кэнниттэн Новосибирскайга химик идэтигэр туттарсар санаалаах. Мин киниэхэ ЕГЭ-тин ситиһиилэхтик туттаран, үөрэххэ киириэн баҕарабын. Саамай кылаабынайа үөрэҕин бүтэрэн баран дойдутугар төннөн кэлиэн баҕарабын. Эһиги эмиэ бары дойдугутугар эргиллэн, Сахаҕыт сирин сайыннарар дьон буолан тахсын, — диэн баҕа санаатын эттэ.
Салгыы Айсен Сергеевич үөрэххэ, наукаҕа, култуураҕа, спорка ситиһиилээх 10 бастыҥ үөрэнээччигэ стипендия туттарда.
Кинилэр ортолоругар мин биир дойдулааҕым Д.П. Коркин аатынан Чурапчытааҕы спортивнай оскуола 11-с кылааһын үөрэнээччитэ Александра Рожина баар.
Стипендиаттар ааттарыттан махтал тылы Нерюнгри куорат Михаил Кочнев аатынан 1 №-дээх оскуола 11-с кылааһын үөрэнээччитэ Юлия Ганяк эттэ.
«Путь воина» Бүтүн Арассыыйатааҕы байыаннай-тактическай күрэхтэһии кыайыылааҕа, Саха Өрөспүүбүлүкэтин сүүмэрдэммит хамаандатын капитана Ил Дархаҥҥа бэлэх туттарда.
Манна кэлэн кыттыбыт оҕолорго инникитин өссө да үрдүктэн үрдүк ситиһиилэри баҕарабын. Биир саастыылаахтарым ситиһиилэрин көрөммүн үөрдүм. Эһиги үөрүүгүтүгэр кыттыспыт дьоллоох киһибин.
Марта ЛИСТИКОВА, XI кылаас, С.Д.Флегонтов аатынан Хадаар орто оскуолата, Чурапчы