Быйылгы уратылаах сайыҥҥы сынньалаҥ, лааҕырдар үлэлэрин туһунан үөрэх уонна наука миниистирэ Михаил Сивцев билиһиннэрэр.
Быйыл оҕолору чэбдигирдэр сайыҥҥы лааҕыр үлэтэ, тарҕана турар ыарыынан сибээстээн, уратылардаах ыытыллыаҕа.
СӨ Ил Дархана А.С. Николаев ыам ыйын 21 күнүгэр үөрэх дьылын түмүктүүр туһунан мунньаҕар лааҕыр бастакы сезона бэс ыйын 15 күнүттэн саҕаланара быһаарыллыбыта.
Ол курдук, сайыҥҥы лааҕыр бастакы сезонугар оҕолору чэбдигирдэр, сынньатар үлэлэр, саамай уһук улуустартан ураты, дистанционнай халыыбынан (онлайн уонна оффлайн) бары нэһилиэнньэлээх пууннары хабан ыытыллыаҕа. Интэриниэт ситимэ мөлтөх сирдэригэр кейс-технологияны туттар тоҕоостоох.
Сайыҥҥы лааҕыр иккис түһүмэҕэ булкаастаах халыыбынан ыытыллара былааннанар. Үһүс сезон хаччахтааһын бүттэҕинэ, Роспотребнадзор ыйыытын-кэрдиитин тутуһан, үгэс буолбут халыыбынан ыытыллыан сөп.
Билигин сайыҥҥы лааҕырга бэлэмнэнии уонна стационарнай чэбдигирдэр лааҕырдары арыйыы үлэлэрэ ыытыллаллар. 651 үөрэх тэрилтэтиттэн 75%-на санитарнай-эпидимиологическай түмүк ылаары Роспотребнадзорга докумуоннарын туттардылар. Бу сылга өрөспүүбүлүкэбитигэр 147 тыһыынча оҕо оскуолаҕа үөрэнэр. Олортон 135 үөрэнээччини сайыҥҥы дьарыгынан хааччыйар булгуччулаах. Бастакы сезоҥҥа 72 тыһыынча оҕо хабыллыахтаах.
- Бары биир сүбэнэн быһаарсан, түргэнник, ураты толкуйдаахтык үлэлиэхпитин наада. Өрөспүүбүлүкэ үрдүнэн ыарахан балаһыанньалаах олохтоох оҕолору, ону тэҥэ хаачыстыбалаах, куттала суох сынньалаҥынан хааччыйыыны кэтээн көрөр биир кэлим үлэ ыытыллыаҕа.
Оҕо сайыҥҥы сынньалаҥын тэрийиигэ туһааннаах иһитиннэриилэри уонна методическай сүбэлэри бу порталларга көрүҥ: олохтоох нэһилиэнньэҕэ – www.sakhaedu.ru, төрөппүттэргэ – саха-отдых-детей.рф, оҕолорго – profportal.sakha.gov.ru.