Биһиги, “Кэскил” медиа оскуола юнкордара “Расскажи о главном” диэн сменаҕа Дьокуускай куоракка “Сосновый бор” лааҕырга кэлэн үөрэнэ, сынньана сылдьабыт.
Бу лааҕырга “Муус устар” ыччат өрөспүүбүлүкэтээҕи фестивалын иһинэн кэлбиппит. Бу иннинэ ыытыллыбыт сүүмэрдиир түһүмэҕи ааһаммыт, лааҕырга ыҥырыллыбыппыт. Кулун уттар 22 күнүгэр «Триумфка» буолар «Муус устар» ыччат фестивалын түмүктүүр чааһыгар кыттыыны ылыахпыт.
Н.Е. Мординов-Амма Аччыгыйа аатынан “Кэскил” оҕо бэчээтин кыһатын куратордара биһигини үөрэтэ, сүбэлии-амалыы сылдьаллар. Алта хамаандаҕа арахсан, куратордарбыт сүбэлэринэн иккилии видео ролик оҥорор сорудахтаах күннэтэ үлэлиибит, элбэҕи толкуйдуубут. Ону таһынан бииртэн биир интэриэһинэй көрсүһүүлэргэ сылдьабыт.
Ол курдук кулун тутар 18 күнүгэр икки улахан көрсүһүүгэ сырыттыбыт. Саха Өрөспүүбүлүкэтин инновацияҕа, цифровой сайдыы уонна инфокоммуникационнай технологияларга миниистирин Василий Васильевич Ефимовы кытта көрүстүбүт. Көрсүһүүнү «Кэскил» оҕо бэчээтин кыһатын дириэктэрэ Ольга Ивановна Семенова салайан ыытта.
Иккис көрсүһүүбүтүгэр «Сахабэчээт» диэн өрөспүүбүлүкэ биир саамай улахан медиа тэрилтэтин иһинэн үлэлиир «Улус.медиа» сетевой редакциятыттан Зинаида Михайловна Григорьеваны уонна «Сахабэчээт» бэлэмнии сылдьар, быйылгы сылга улахан экраҥҥа тахсыахтаах Тимофей Сметанин уонна Яков Стручков «Мэхээлэчээн булчут кэпсээннэрэ» айымньыларынан киинэ режиссера Александр Лукины кытта көрүстүбүт.
Көрсүһүүнү «Кэскил» оҕо бэчээтин кыһатын кылаабынай эрэдээктэрэ Татьяна Васильевна Чьямова салайан ыытта.
https://t.me/keskil_media2020/15969
Василий Васильевич медиа оскуолалар үлэлэрин, юнкордары өрөспүүбүлүкэ инники сайдыытын кытта сибээстээн көрөр эбит.
Холобур, соторутааҕыта ыраах хоту сытар Чокурдаахха тиийэ сылдьан бу туһунан эмиэ эппит уонна хоту сир олоҕун көрдөрөр интэриэһинэй видео роликтары оҥорон таһаарын диэн Чокурдаах оскуолатыгар аныгы техникалары бэлэхтээбит.
Василий Васильевич ыам ыйын 19 күнүгэр 1985 сыллаахха Дьокуускай куоракка төрөөбүт. Дьокуускайга 8 №-дээх оскуолаҕа үөрэммит. Кини үөрэммит оскуолата билигин классическай гимназия диэн ааттаах. Салгыы Ирландияҕа Национальнай университекка үөрэммит, Москва куоракка улахан тэрилтэҕэ үлэлээбит. Василий Васильевич миниистир буолан тахсыар диэри Америкаҕа, Великобританияҕа тиийэ үөрэнэн, инновационнай технология хайысхатыгар олус элбэх уопуту ылбыт. Ол кэнниттэн дойдутугар кэлэн, киэҥ сирдэринэн сылдьан, үөрэнэн ылбыт билиитин-көрүүтүн Саха сирэ сайдыытыгар анаан үлэлии сылдьар. Кэргэннээх, икки кыыс оҕолоох.
“Кэскил” медиа оскуола юнкордара биир чаас устата буолбут көрсүһүүгэ элбэх ыйытыыны биэрдилэр. Холобур, медиа хайысха Саха сиригэр туох инникилээҕий диэн. Онуоха миниистир маннык хоруйдаата:
– Медиа кэскилэ олус киэҥ. Кини уопсастыбаҕа дьайар күүһэ олус улахан. Медиа сырдатар дьону уонна аудиторияны ситимниир. Ол эрээри билигин биһиэхэ медиа ситэ сыаналана илик. Ол гынан баран медиа уопсастыба олоҕор куруук баар этэ уонна баар буолуо даҕаны. Бу сыалай индустрия. Мин санаабар, манна үлэни уонна дохуоту булунуу 100 бырыһыан куруук баар буолуоҕа. Билигин блогердар олус элбэх харчыланаллар. Элбэҕэ бэрт буолан, үгүстэрэ нолуоктарын төлөөбөккө, олус хобдох түмүккэ кэллилэр.
Медиа чиэһинэйдик, ыраастык, сиэрдээхтик сайдыахтаах.
Ыччат инновацияҕа ханнык оруолу ыларый диэн ыйытыыны Василий Васильевич наһаа сэргээтэ.
– Олус үчүгэй ыйытыы буолла. Бастаан ыччат диэн кимий диэҥҥэ тохтуохха. Ыччаты кытта биир өйгө-санааҕа кэлэн кэпсэтэр уустук соҕус. Миэхэ кэпсэтэрбэр уустук ыччат сааһа – 25. Бу университеты бүтэрбит эдэр специалистар. Маныаха көлүөнэ ситимин олохтооһун оруола тахсан кэлэр. Эдэр дьон инновационнай технология, ордук технологическай предпринимательствоҕа ыллылар да тута бизнеһы оҥорон барбаттар. Чааһынай бизнестээх төрөппүттэрдээх оҕолор бу үлэ хайдах курдук уустугун билэр буолуохтааххыт. Бу кинилэргэ сүрдээх улахан эппиэтинэс. Бэйэҥ ылсыбыт бизнескин эйигиттэн ордук ким да сайыннарбат. Күүскэ үлэлиэххин наада. Түһүү-тахсыы баар буолар. Онтон атаххар туран баран ону салгыы сайыннарар эмиэ туспа улахан уонна уустук үлэ. Биһиги технологическай предпринимательство хайысхатын ырытан көрбүппүт. 50 бырыһыаннара атахтарыгар кыайан турбакка туораан биэрбиттэр. Итиннэ киһи соһуйара суох. Тоҕо диэтэххэ, технологическай хайысха саҥа хайысха буолар. Онон билбэппит элбэх.
Билиҥҥи ыччат предпринимательствоҕа киирбэт буоллаҕына, кини инновация диэн тугун билбэт. Онтон инновация саҥа идеяҕа, саҥа көрүүгэ, киэҥ билиигэ, элбэҕи ааҕыыга тирэҕирэр.
Маша СИБИРЯКОВА, Х кылаас,
С.К. Макаров аатынан Чурапчы гимназията
Родион Перевалов хаартыскалара, VIII кылаас,
Лөгөй лиссиэй-интэринээт, Уус Алдан
Комила Аржакова видеота, Х кылаас,
А.П. Илларионов аатынан Хайахсыт орто оскуолата, Чурапчы