Сонун-нуобас балысханнык уонна түргэнник тарҕанар аныгы тэтимнээх үйэтигэр дьоҥҥо-сэргэҕэ иһитиннэриини сөптөөхтүк тиэрдии суруналыыстан туспа сатабылы эрэйэр. Онуоха ааҕааччыга сонуну толору тиэрдии биир кэрэхсэбиллээх ньыматынан тиэкиһи, видео матырыйааллары бииргэ түмэн сырдатар ньыманан ЛОНГРИД буолар. Суруналыыс идэтин баһылыан баҕалаах кэнчээри ыччат лонгриды оҥорууга WorldSkills чемпионатка күрэхтэстилэр. Чемпионат туһунан Анжелика Александрова, Изабелла Романова («Мэҥэбил» пресс-киин) сырдаталлар.
Идэҕин сөпкө талыаҥ — олоҕуҥ суолун тобулуоҥ
Тохсунньу 19 – 21 күннэригэр Дьокуускай куоракка өрөспүүбүлүкэтээҕи WorldSkills Russia IX аһаҕас региональнай чемпионат «Мультимедийнай суруналыыстыка» кэмпитиэнсийэҕэ күрэх ыытылынна. Күрэҕи «Юные якутяне» өрөспүүбүлүкэтээҕи ресурснай киин иилээн-саҕалаан тэрийдэ. Уопсайа сэттэ улуустан суруналыыстыка идэтигэр холонуон баҕалаах эдэр кэрэспэдьиэннэр күөн көрүстүлэр.
Экспертэринэн ХИФУ наука уонна инновация Департаменын үлэһитэ, СР наука алын Академиятын мультимедийнай суруналыыстыка оскуолатын тэрийээччи Сардаана Сыромятникова, «Харысхал» благотворительнай фонд пресс-сэкэрэтээрэ Екатерина Винокурова, «Ил Түмэн» Парламент хаһыатын редактора Анисия Иевлева, СР национальнай библиотека үлэһитэ, Ысыах culture-Yakutia.com сайт редактора Татьяна Павлова үлэлээтилэр.
Иккилии кыттааччылаах хамаандалар «Идэни талыы- дьоһуннаах хардыы» тиэмэҕэ анаарар хайысхалаах, биллэрэр-иһитиннэрэр лонгрид (сайт) онорорго күрэхтэстилэр. Үөрэнээччилэр үс күн устата сайт былаанын оҥоруу, ыстатыйа суруйуу, видео, аудио-интервью ылыы, кыттааччылартан ыйытык ыытан, инфографика оҥоруу, сайты Тilda платформаҕа таҥан, Интернет ситимигэр таһаарыы курдук түбүктээх үлэни көрүстүлэр. Күрэх сорудахтара, хас биирдии хаамыыта туспа бириэмэлээх, анал ирдэбиллээх буолан, оҕолор түргэн-тарҕан туттунуулаах, айымньылаах, сытыы толкуйдаах буоларга үөрэннилэр.
Дьааҥы улууһун Боронук орто оскуолата, Мэҥэ Хаҥалас улууһун В.П. Ларионов аатынан Майа орто оскуолата, Таатта улууһун А.И. Софронов аатынан Ытык-Күөл орто оскуолата, Чурапчы улууһун В.С.Соловьев-Болот Боотур аатынан Хатылы орто оскуолата, Горнай улууһун С.И. Тарасов аатынан Өрт орто оскуолата, Ньурба улууһун Маалыкай орто оскуолата, Сунтаар улууһун С.А. Зверев аатынан Түбэй-Дьархан орто оскуолата, Уус Майа улууһун Петропавловскай орто оскуолата хамаандалары туруордулар.
Түмүккэ кыайыылаахтарынан таҕыстылар:
1 миэстэ – В.П. Ларионов аатынан Майа орто оскуолатын хамаандата, Мэҥэ-Хаҥалас улууһа. Александрова Анжелика, Яковлев Дьулус. Салайааччы – Изабелла Яковлевна Романова;
2 миэстэ – В.С.Соловьев-Болот Боотур аатынын Хатылы орто оскуолата, Чурапчы улууһа. Валерия Федорова, Яша Чичигинаров, салайааччы- Батарина Наталья Васильевна;
3 миэстэ – А.И. Софронов аатынан Ытык-Күөл орто оскуолата, Таатта улууһа. Попова Айталина,Петров Алексей, салайааччы- Константин Леонидович Егоров.
