Тиэлиги сирэ-уота улууска да, өрөспүүбүлүкэҕэ да олус үчүгэй, кыраһыабай айылҕалааҕынан биллэр. Биһиги нэһилиэкпитигэр чугас эргин суох Ыпсар, Тымырҕа суолга кутуллар таас хостонор карьердар бааллар, манна сэдэх үүнээйилэр, отоннор үүнэллэр. Ону кытары сайын саҕаланыыта мырааммыт саамай үрдүк чыпчаалыгар, айан суолун кытыытыгар Даурия родондендрона диэн ааттаах талах мас кытархай өҥнөөх сибэккилэринэн симэнэр.
Рододендрон ыам ыйын бүтүүтэ — бэс ыйын саҕаланыыта дьылыттан көрөн силигилии олус кылгас кэмҥэ үүнэр. Ыам ыйын 28 күнүгэр А.А. Пахомов аатынан орто үөрэхтээһин оскуолатын «Тобул» диэн үөрэҕи таһынан интеллектуальнай кулуупка дьарыктанар эдэр чинчийээччилэр салайааччыларын Наталия Васильевна Пахомованы кытары “Рододендрону харыстааҥ” диэн ыҥырыы былакааты таһааран ииллилэр. Бу кулуубу Наталия Васильевна тэрийэн үлэлэппитэ ыраатта. Оҕолор олус сөбүлээн дьарыктаналлар. Эдэр чинчийээччилэр төрөөбүт дойдуларын айылҕатын, үүнээйитин, отун-маһын, нэһилиэк биллиилээх дьонун туһунан олус дьаныһан, хасыһан үөрэтэллэр, чинчийэн дакылааттары суруйаллар. Рододендрон үүнээйи туһунан дакылааты сыл аайы суруйан араас таһымнаах кэмпириэнсийэлэргэ ааҕан сырдаталлар, дьон-сэргэ сэҥээриитин ылаллар.
Билигин да чинчийии үлэтин тохтоппокко сылын аайы кэтээн көрөллөр. “Рододендрон сэдэх үүнээйи”, “Рододендрону харыстааҥ” хаартысканан аахсыйаны тэрийэн ыыппыттара. Баннеры Наталия Васильевна көҕүлээһининэн олохтоох дьаһалта уонна олохтоох урбаанньыт Марина Николаевна Захарова үбүлээннэр уонна оҥорторуутугар көмөлөһөннөр, бэйэтин миэстэтин булан ыйанна. Онон кинилэргэ махталбыт улаханын биллэрэбит. Инникитин рододендрон үүнэр сирин нэһилиэк иһинэн ураты харыстанар сир оҥорбут киһи диэн баҕалаахтар. Мантан инньэ бу сэдэхтик үүнэр кэрэ сибэккилээх талахпытын дьон-сэргэ алдьаппакка-кээһэппэккэ харыстааннар, үйэлэртэн үйэҕэ үүнэн силигилии, дьону үөрдэ туруоҕа.
Сардана Сергеева.
Тиэлиги, Мэҥэ Хаҥалас.