Хаатылыма диэн ааттыын да кэрэ алааска биир кыысчаан улааппыта. Кини бэйэтин дьоҕурунан, үлэтинэн уонна өбүгэлэриттэн бэриллибит талаанынан идэтин сөпкө тайанан, билигин аан дойдуга муоданы түстүүр дойдуга, Италияҕа, олорор, айар-тутар. Мэҥэ Хаҥалас Хаптаҕай орто оскуолатын 9 кылааһын үөрэнээччитэ Валя Спиридонова ураты дьылҕалаах биир дойдулааҕын Наташа Ефимова туһунан суруйар.
Наташа ойор күннээх оҕо сааһа Мэҥэ Хаҥалас улууһун Хаатылыматыгар ааспыта. Манна 5 эрэ кылаастаах оскуола баара, онон 6-с кылаастан Хаптаҕайга эһээлээх эбэтигэр көһөн киирбитэ. Оскуолаҕа үчүгэйдик үөрэнэн, ырыа, үҥкүү куруһуоктарыгар сөбүлээн дьарыктаммыта. Ону таһынан оскуолатааҕы «Кустук « телестудияҕа диктор, үрдүкү кылааска музыкальнай редактор буолбута. Кыыс дэгиттэр талааннаах, дьоҕурдаах буолан, оскуола бары тэрээһинигэр көхтөөхтүк кыттара. Өбүгэлэриттэн бэриллибит айар талаана баар буоллаҕа! Эһэтэ И.Е.Ефимов өрөспүүбүлүкэҕэ биллэр чабырҕахсыт , дьоҥҥо биллэр аата Чабырҕах Уйбаан диэн этэ. Онон Наташа удьуор утумун салҕаатаҕа.
Оскуоланы бүтэрэн баран, ырыаһыт буолар баҕатын толорон, музыкальнай училищеҕа үөрэнэ киирбитэ. Үөрэнэр сылларыгар «Саҥа ырыа» курэххэ хаста да ситиһиилээхтик кыттыбыта, Айхаана диэн аатынан биллибитэ. Аркадий Алексеев бөлөҕөр киирэн, элбэхтик гастроллаабыта. Ол сылдьан, кыыс гримныы үөрэнэн, бүрүчүөскэ оҥорорго эмиэ холонон, толкуйдаан баран, олоҕун тосту уларытан, визажист үөрэҕэр үөрэммитэ.
Екатеринбург, Сант-Петербург куорат салоннарыгар үлэлээн, куонкурустарга кыттан, сайдан-үүнэн барбыта. Питерга салоҥҥа үлэлии сылдьан, олоҕун доҕорун көрсөн, Италия5а көһөн, Рим куорат биллиилээх салонугар үлэтин салҕаабыта.
Быыкаайык Хаатылыматтан төрүттээх саха кыыһа Италия биллэр маастардарын кытта тэҥҥэ үлэлии-хамсыы сылдьарыттан биһиги, биир дойдулаахтара уонна «Кустук» студия иитиллээччилэрэ астынабыт , киэн туттабыт, кини дьулууруттан, туруоруммут сыалын ситиһэриттэн холобур ылабыт.