Мэҥэ-Хаҥалас улууһун Е.Д.Кычкин аатынан Матта орто оскуолата агро-экологическай хайысханан таһаарыылаахтык үлэлиир.
Ол курдук оскуолабыт биология уонна химия учуутала Сардаана Петровна Гоголева салайыытынан «Ларикс» куруһуокка элбэх оҕо умсугуйан туран дьарыктанар. Кинилэр дьиэҕэ үүнэр кэрэ сибэккилэртэн саҕалаан, аныгы кэмҥэ биһирэммит «микрозелень» олордон силис таттаран, үүннэрэллэр, көрөллөр-харайаллар.
Ону таһынан оҕолор хаһыс да сылын тулалыыр эйгэни үөрэтэллэр, айылҕа дьикти кистэлэҥнэрин чинчийэллэр. ХИФУ Айылҕа көстүүтүн билим институтун биология-химия салаатын профессора Софронов Радион Павлович Софроновы, доцент Жанна Михайловна Охлопкованы кытта ыкса үлэлииллэр.
Ол курдук, алаастартан буор, уу ылан, ХИФУ чинчийэр лабораториятыгар анаалыска ыытан, түмүгүн сурунан иһэллэр.
Бу толору чинчийиллибит алаастар, күөллэр кэлэр көлүөнэҕэ кэрэ бэлэх буолуохтара.
Ааптар: Вероника Александрова