Хаҥалас Хачыкаатын кыыһа, Дьокуускайдааҕы педагогическай колледж 2 кууруһун устудьуона Валерия Олесова кылыыга 25 м 36 см ыстанан Манчаары оонньууларын бастакы рекордун олохтоото уонна төрөөбүт Хаҥалаһын улууһугар маҥнайгы кыһыл көмүс мэдээли аҕалла!
Иккис миэстэни Чурапчы спортсменката Ньургуйаана Смирникова 23 м 28 см ылла. Үһүс миэстэҕэ Дьокуускай куорат хамаандатын көмүскүүр Дарья Добрынина 22 м 52 см көрдөрүүлээх тигистэ.
Ааспыт эрэ ыйга Валерия республиканскай чемпионакка өссө биир рекорду көрдөрөн турар, онно кини ыстаҥаҕа рекорда — 24 м 75 см этэ!
Валерия ыстаҥанан дьарыктаммыта икки эрэ сыл буолбут. Ол иннинэ кини чэпчэки атлетиканан дьарыктаммыт, Үөһээ Бүлүүгэ ыытыллыбыт Манчаары оонньууларыгар сүүрүүгэ 5-с кэлбит эбит.
Сарсын Валерия ыстаҥаҕа киирсиэхтээх, онтон өйүүн —»куобахха». Валерия Олесованы эҕэрдэлиибит! Инникитин өссө үрдүк көрдөрүүлэри баҕарабыт!
Анна СЛЕПЦОВА.