Бэс ыйын 16-17 күннэригэр Н.Н. Тарскай аатынан «Туймаада» стадион киэҥ уораҕайыгар Анатолий Добрянцев кэриэһигэр үһүс төгүлүн ыытыллар өрөспүүбүлүкэтээҕи сахалыы ыстаныыларга турнир барыта 185 спортсмены 30 хамаандаттан муста. Бастыҥтан бастыҥ атах оонньооччулар «Манчаары оонньууларыгар» иккис сүүмэрдиир түһүмэҕэр путевка ылар иһин күөн көрүстүлэр.
Турнир тэрийээччилэринэн Баһылай Манчаары аатынан саха төрүт успуордун өрөспүүбүлүкэтээҕи киинэ уонна Хаҥалас улууһун успуордун кэмитиэтэ буолаллар. Уопсай бириис пуондата — 600 тыһ. тахса солкуобай.
Манна этэр эбит буоллахха, «Манчаары оонньуулара» успуорт төрүт көрүҥнэригэр XXII Спартакиада бастакы сүүмэрдиир түһүмэҕэ бэс ыйын 7-8 күннэригэр Бэрдьигэстээххэ өрөспүүбүлүкэтээҕи сахалыы ыстаныылар чемпионатыгар буолан ааспыта. Күрэхтэһии, буоларын курдук, фавориттары, бастыҥтан бастыҥнары таһаартаабыта. Ол курдук, эр дьоҥҥо Горнайтан сылдьар кэскиллээх атах оонньооччута Кай Адамов — 2021 с. Бэрдьигэстээххэ ыытыллыбыт «Манчаары оонньууларын» муҥутуур чөмпүйүөнэ. Онтон кыргыттарга Хаҥалас кылыыһыт кыыһа, «Манчаары оонньуулара» 21-с Спартакиадатын муҥутуур чөмпүйүөнэ Валерия Олесова буолар.
Валерия Олесова быйылгы өрөспүүбүлүкэ чемпионатыгар тус көрдөрүүлэрин лаппа тупсаран, дьахталларга саҥа рекорд олохтоото: кылыыга — 26, 45 м, ыстаҥаҕа — 25, 22 м, троеборье сууммата — 71, 62 м.
— Добрянцев турнирыгар үһүстээн кыттабын, үһүс төгүлүн кыайабын. Бу сезоҥҥа саамай сөбүлээн ыстанар турнирым буолар, тоҕо диэтэр, бэйэм Хаҥаласпын, Анатолий Анатольевич биир дойдулааҕым этэ. Бу күрэхтэһиигэ мин кыратык эчэйиилээх ыстанным, ол да буоллар син-биир бэйэбин тулуһан кыайдым диэххэ наада. «Манчаары оонньууларыгар» эчэйиибин эмтээн, үчүгэйдик бэлэмнэнэн кыттыахпын наада. Дьон бары саҥа рекорд күүтэр, онон, ону ылар туһугар, күүскэ үлэлиэҕим. Түөрт сыллааҕы көрдөрүүбүн тупсарыам, быйылгы «Манчаары оонньууларыгар» үчүгэй призовой фонд турда, онон Федерацияҕа махтаныахпын баҕарабын. Бу биһиэхэ, спортсменнарга, стимул буолар, — диэн санаатын үллэстэр Валерия Олесова, СӨ успуордун маастара, «Манчаары оонньууларын» 2021 с. абсолютнай чөмпүйүөнэ, дьахталларга сахалыы ыстаныыларга рекордсмен.
Кырдьык, быйылгы «Манчаары оонньууларыгар» атах оонньооччуларга улахан бириис турда, ол курдук троеборье (кылыы, ыстаҥа, куобах) уопсай суумматын муҥутуур кыайыылаахтара эр дьоҥҥо, дьахталларга биирдии мөлүйүөн солк. сүүйүөхтэрин сөп!
Эр дьоҥҥо фаворит Кай Адамов бастыҥ утарсааччытынан Таатта кылыыһытын Андрей Васильевы ааттыыр. 2021 c. «Манчаары оонньууларын» абсолютнай чөмпүйүөнэ, «ыстаҥа» рекордсмена Кай Адамов:
— А.А. Добрянцев кэриэһигэр ыытыллар турнирга буолуоҕуттан ыла кыттабын. Утарсааччыларым бары үчүгэйдик эбиллибиттэр, онон «конкуренция» кытаанах. Киирсиилэр абытайдаах буоллулар, абсолюткаҕа отой аҕыйахтыы см киирсэр буоллубут быһыылаах. Кылыыга, буурга даҕаны, эмиэ үчүгэй кылыыһыттар бааллар, хас биирдии көрүҥҥэ үчүгэй спортсменнар бааллар. Сүрүн утарсааччым Андрей Васильев, Таатта спортсмена, Спартакиада кини дьиэтигэр, дойдутугар, буолар. Түөрт сыллааҕыта мин дьиэбэр, Горнайга, буолбута. Билигин ыалдьыт буолан тиийэбин. Тус рекордум: ыстаҥаҕа — 47,43 м, кылыыга ааспыт «Манчаары оонньууларын» Егор рекордун ситэ сатаабытым даҕаны, ырааҕа бэрт этэ, сиппэтэҕим, «личкам» — 47,47 м. Билигин троеборьеҕа чугаспын. Виталий Васильев рекордугар чугаспын. Быйылгы «Манчаары оонньууларыгар» рекорду ылыахпын сөп. Виталий Васильевы оҕо эрдэхпиттэн холобур оҥостубут спортсменым, кинини көрөн, кинини үтүктэн, атах оонньуутугар тиийдэҕим дии.
Максим Оегостуров, СӨ сахалыы национальнай ыстаныылар федерациятын толорооччу дириэктэрэ, Анатолий Добрянцев кэриэһигэр үһүс төгүлүн ыытыллар өрөспүүбүлүкэтээҕи сахалыы ыстаныыларга турнир кылаабынай судьуйата:
— Онтон турнир бастыҥ фавориттара Кай Адамов, олох үчүгэйдик ыстанна, кыргыттарга — Валерия Олесова, бэтэрээннэргэ — Андрей Софронов, оҕолорго Маргарита Тумакованы, Максим Семеновы бэлиэтиэм этэ. Буолаары турар «Манчаары оонньууларыгар» элбэх рекорд алдьанара буолуо, дьахталларга, эр дьоҥҥо да, оҕолорго да. Спортсменнар олох үчүгэй турукка сылдьаллар, онон үчүгэй түмүгү көрдөрүөхтэрэ. Билигин, сүрүнэ — доруобуйа, эчэйиини ылбатыннар, бэйэлэрин тус көрдөрүүлэрин лаппа куоһурдуннар уонна сытыы киирсиилээх күөн күрэһи көрдөрдүннэр!
«Манчаары оонньуулара» успуорт төрүт көрүҥнэригэр XXII Спартакиада Таатта улууһугар Ытык Күөл сэлиэнньэтигэр от ыйын 7-13 күннэригэр ыытыллар. Спартакиада бырагырааматыгар барыта 11 успуорт национальнай көрүҥэ киирдэ. Барыта 1700-тэн тахса спортсмен кыттыыны ылыаҕа.
keskil14.ru