Бэс ыйын 7 күнүгэр Горнай улууһун Одуну нэһилиэгэр Л.Н. Харитонов аатынан Маҕарас орто оскуолатын көҕүлээһининэн өрөспүүбүлүкэтээҕи агро ыһыах үрдүк таһымнаахтык ыытылынна. Өрөспүүбүлүкэҕэ агро хайысханан үлэлиир 25 оскуола көхтөөхх кыттыыны ылла, 400–тэн тахса кыттааччы кэлэн ыалдьыттаата.
Маны сэргэ, ыҥырыылаах ыалдьыттарынан Тыа хаһаайыстыбатын миниистирэ А.А. Александров, Ил Түмэн бэрэссэдээтэлин солбуйааччы А.А. Григорьева, СӨ Үөрэҕин уонна билимин миниистирин бастакы солбуйааччы Нь.М. Павлов, төрүт тылы үөрэтии, харыстааһын уонна сайыннарыы киинин салайааччыта Ф.В. Габышева, Үөрэх министиэристибэтин уопсай үөрэхтээһинин, иитиитин уонна эбии үөрэхтээһинин департаменын салайааччытын солбуйааччы М.И. Корякина, агрооскуолалар Сойуустарын эппиэттиир дириэктэрэ П.Г. Дягилев, Горнай улууһун аҕа баһылыга Н.В. Андреев, Горнай улууһун үөрэҕин управлениетын начальнига В.И. Сметанина уонна о.д.а. буоллулар. Ыһыах алгысчыт М.М. Порядина мааны алгыс тылынан саҕаланна, Кыайыы оһуохайа этилиннэ.
Оскуола кэлэктииптэрэ бары параадтаан киирэн, агрооскуола гимнын өрө көтөҕүллүүлээхтик ыллаатылар. Агрооскуола үлэтигэр, сайдыытыгар үрдүк көрдөрүүлээх үлэһиттэргэ бочуотунай грамоталар, махтал суруктар туттарылыннылар.
Ыһыахха 6 көрүҥүнэн күрэхтэр ыытылыннылар: “Биэс бэһиэлэй кыргыттар”, “Тыа сирин оонньуулара”, “АгроБоотур”, “Дьүрүскэн ырыа дойдута”, “Хабылык, хаамыска”, “Түргэн куб”. Хас биирдии оскуолаттан кыттааччы бэйэтин күүһүн, бэлэмин, кыайыыга дьулуурун көрдөрдө.
«БИЭС БЭҺИЭЛЭЙ КЫРГЫТТАР»:
1 миэстэ — В.П.Ларионов аатынан Майа орто оскуолата
2 миэстэ — Таатта улууһун Тыараһа орто оскуолата
3 миэстэ — В.Г. Короленко аатынан № 1 Амма орто оскуолата
«ДЬҮРҮСКЭН ЫРЫА ДОЙДУТА»:
1 миэстэ — Мэҥэ Хаҥалас улууһун В.П. Ларионов аатынан Майа орто оскуолата
2 миэстэ — Сунтаар улууһун Бордоҥ орто оскуолата
3 миэстэ — В.Г. Короленко аатынан № 1 Амма орто оскуолата
«ХАБЫЛЫК, ХААМЫСКА, ТҮРГЭН КУБ»:
Хабылык
Дьахталлар:
1 миэстэ — Турнина Л.Н., Таатта, Тыараһа
2 миэстэ — Петрова Л.Г., Сунтаар, Бордоҥ
3 миэстэ — Старостина Р.Ф., Ханалас, Малдьаҕар
Эр дьоннор
1 миэстэ — Радионов С.А., Үөһээ Бүлүү, Кэнтик
2 миэстэ — Кычкин С.Н., Сунтаар, Бордоҥ
3 миэстэ — Гаврильев Н.С., Амма орто оскуолата
Хаамыска
Дьахталлар:
1 миэстэ — Калитина М.В., Хаҥалас, 2 Малдьаҕар
2 миэстэ — Турнина Л.Н., Таатта, Тыараһа
3 миэстэ — Иванова Р.Е., Бөтүҥ, Амма
Эр дьоннор
1 миэстэ — Радионов С.А., Кэнтик, Үөһээ Бүлүү
2 миэстэ — Гаврильев Н.С., Амма орто оскуолата
3 миэстэ — Филиппов Н.М., Ороссолуода, Мэҥэ Хаҥалас
«ХОМУУР КҮРЭХ»
Дьахталлар
1 миэстэ — Плотникова Л.П., Мэҥэ-Хаҥалас, Мэлдьэхси
2 миэстэ — Семенова С.Е., Мэҥэ-Хаҥалас
3 миэстэ — Хабарова А.П., Тулагы
Эр дьоннор
1 миэстэ — Гаврильев С.Т., Хатас
2 миэстэ — Сивцев А.В., Тулагы
3 миэстэ — Иванов П.В., Улахан Аан, Хаҥалас
«АГРОБООТУР»:
1 миэстэ — Никита Петров, Маҕарас орто оскуолата, Горнай
2 миэстэ — Ньургун Уваров, Хаҥалас орто оскуолата
3 миэстэ — Егор Оконешников, Хатас орто оскуолата
«ТЫА СИРИН ООННЬУУЛАРА»:
1 миэстэ — Өктөм орто оскуолата, Хаҥалас
2 миэстэ — Маҕарас орто оскуолата, Горнай
3 миэстэ — Майа орто оскуолата, Мэҥэ-Хаҥалас
Маны таһынан «Нормативно-правовое и научно –методическое обеспечение ФГОС в части агрообразования» тиэмэҕэ төгүрүк остуол тула кэпсэтии ыытылынна.
Өрөспүүбүлүкэ агрооскуолаларын инники сайдыытын туһунан бэйэтин санаатын Феодосия Габышева, Төрүт тылы үөрэтии, харыстааһын уонна сайыннарыы киинин салайааччыта үллэстэр:
— Бу маннык тэрээһин, мустуу наадалаах. Үлэбит ис хоһоонун тэҥҥэ тутуохпутун наада, холобур, култуура, спорт өттө күүскэ сайдан иһэр, онтон биһиги агро үөрэтээһини хайдах олоххо киллэрэри уонна туох бүгүн ыарахаттар баалларый, ону биһиги хайдах туоратыахтаахпытый диэҥҥэ элбэхтик көрсүһүүлэргэ кэпсэтиэхпитин наада. Оскуола атын таһымҥа тахсыахтаах. Федеральнай таһымҥа сокуон, норматив уларыйарын күүтэн олорбокко, «не типовой» оскуола тэринэн саҥалыы хайысханан атын суолу тобулууга, саҥа моделлары оҥорууга онно баҕа санаабытын эттибит.
СӨ Үөрэх уонна билим миниистирин бастакы солбуйааччы Ньургун Павлов:
— Үгэс буолбут агроыһыахха быйыл олус элбэх оскуола кэлэн кыттыыны ыла сылдьар. Олус үрдүк таһымҥа ыытылла турарыттан үөрдүбүт. Өрөспүүбүлүкэҕэ агропрофилированнай үөрэхтээһин хайдах быһыылаахтык барарын туһунан түгэн буламмыт кэпсэттибит. Сүрдээх элбэх этии киирдэ. Хайа хайысханан сайдыыны ыытарбытын, тустаах этиилэри барытын истэн бэлиэтэннибит. Инникитин агропрофилированнай оскуолаларга хаачыстыба үрдүүрүгэр, тыа сиригэр оҕолор агрохайысханан, кэлин даҕаны, идэ оҥостон үлэлииллэригэр үлэлэһиэхпит.
СӨ Агрооскуолаларын сойууһун эппиэттиир дириэктэрэ Петр Дягилев:
— Быйылгы 2024/25 үөрэх сылыгар Маҕарас орто оскуолата үлэтинэн-хамнаһынан аан дойдуга тиийэ улаханнык билиннэ. Билигин биир улахан үчүгэй үлэлээх оскуоланан биллэр. Тэрээһин олус үчүгэй, сирэ-уота көнөтө, айылҕата кэрэтэ, халлааммыт туран биэрдэ. Өрөспүүбүлүкэбит 25 оскуолата, 400 тахса кыттааччы, ону тэҥэ ыҥырыылаах ыалдьыттар 100-кэ кэриҥэ киһи кэлэн барбыта, олус үрдүк көрдөрүү дии саныыбын. Быйылгы ыһыах бириистэрэ даҕаны оһуобайдар. Маны сэргэ, төгүрүк остуолга үлэбитин-хамнаспытын кэпсэттибит, санаа үллэһиннибит, саҥа идеялары иһиттибит. Ыһыахпыт этэҥҥэ ааспытыгар, элбэх оскуола кэлэн көхтөөхтүк кыттыбытыгар махталбын тиэрдэбин.
Матырыйаалы бэлэмнээтэ Маҕарас орто оскуолата.
keskil14.ru