Ахсынньы ый 22 күнүгэр С.И. Тимофеев-Кустуктаанап аатынан Маҥаны орто уопсай үөрэхтээһин оскуолатыгар сүдү улахан суолталаах күн буолан ааста. Ол курдук, илин эҥэр Чурапчы, Таатта, Амма улуустарын холбоһуктаах, Аан дойдутааҕы эдэр ыччат Ийэ дойдуга бэриниилээх буолуутун «Вечно живые герои» форумун кыттыылаахтара, Карбышевскай хамсааһын салайааччыта Дьячковский Михаил Владимирович Дьячковскай бойобуой знамяны аҕалан туттарда.
Балаҕан ыйын 27 күнүгэр 2022 сыллаахха Санкт-Петербург куоратыгар, Новгородскай уобалаһын Старорусскай оройуонугар «Юные карбышевцы» көрдүүр-чинчийэр хамсааһыныгар 19 туһунан хайыһар биригээдэтин 12 гвардейскай стрелковой корпус 27 армия хотугулуу-арҕаа фронун олунньу 23 күнүгэр 1943 сыллаахха Илмень күөлгэ геройдуу өлбүт буойун саллааттары кэриэстээн Бойобуой Знамя тутар үрдүк чиэскэ тиксибиттэр.
Бүлүү куоратыттан утары айаннаан милиция подполковнига, Российскай Федерация ис дьыала уорганын бэтэрээнэ, Бүлүү бочуоттаах олохтооҕо «Гражданская доблесть» бэлиэ хаһаайына Седалищев Дмитрий Сергеевич, Н.С. Степанов аатынан Бүлүү орто уопсай үөрэхтээһин оскуолатын байыаннай спортивнай кулууп «Юные патриоты» эдэр армеецтара Максим Иванов, Арчын Кузьмин кэллилэр. Кинилэргэ С.И. Тимофеев-Кустуктаанап аатынан Маҥаны орто уопсай үөрэхтээһин оскуолатын үөрэнээччилэрэ Костя Оленов, Саша Чемезов, Антон Петров Бойобуой Знамяны Бүлүү улууһугар туттардылар. Биһиги нэһилиэккэ Илмень күөл кыргыһыытыгар сылдьыбыт буойун саллааттар хос сиэннэрэ бааллар, ол курдук Спира Данилов, 8 кылаас үөрэнээччитэ, Вика Сивцева, 11 кылаас үөрэнээччитэ, Антон Петров, 11 кылаас үөрэнээччитэ.
Бу улахан тэрээһиҥҥэ олохтоох дьаһалта баһылыга М.Н. Текеянов тыл эттэ. Оскуола социальнай педагога П.Н. Баишева Маҥаны нэһилиэгиттэн Илмень күөл алдьархайдаах кыргыһыытыгар сылдьыбыт буойун саллааттар тустарынан сырдатан кэпсээтэ. Оҕолорго Михаил Владимирович Илмень күөл кыргыһыытын хаартыскаларынан, кинигэ быыстапкалаан, презентация нөҥүө көрдөрөн сиһилии кэпсээтэ. Кинилэри биир мүнүүтэлээх тохтобулунан охтубут буойуннары кэриэстээтилэр.
Эдэр көлүөнэ ыччаттарбыт Аҕа дойдуну көмүскүүр сэриигэ советскай дьон геройдуу быһыыларын, бырааттаһыыларын уонна бииргэ сомоҕолоһууларын туһунан ордук киэҥник, дириҥник үөрэтэн билиэхтэрэ.
Хаартыскаҕа: Ильмен Күөлгэ кыргыһыы экранизациятыттан.
С.И. Тимофеев-Кустуктаанап Маҥаны орто уопсай үөрэхтээһин оскуолатын директоры иитэр үлэҕэ солбуйааччы А.И. Иванова.