«Чуораанчык» сурунаал 2021 сыл ахсынньы ыйынааҕы нүөмэригэр бэчээттэммит «Оҕолоох ыалтан оннооҕор уот үөрэр» диэн Капитолина Семёнова-Саар Көстөкүүн Кыыһа кэпсээнин ааҕааччыларбыт олус сэргээбиттэр. Ол туһунан бэйэлэрин санааларын Дьокуускай куорат 17 №-дээх орто оскуолатын II «Б» (кылаас салайааччыта Айталина Александровна Сидорова), III «В» (кылаас салайааччыта Любовь Святославовна Заровняева) кылааһын үөрэнээччилэрэ суруйан ыыппыттар.
***
Мин санаабар, оҕолор аан бастакыттан сыыһа гыналлар. Кинилэр наар этиһэллэр, мөккүһэллэр, кыыһырсаллар. Ол барыта сүрэҕэ суохтарыттан тахсар. Кэнники, хата, сыыһаларын билинэллэр, биир санааҕа кэлэллэр: дьиэ үлэтин бииргэ толорор буолаллар.
Эрик МАКСИМОВ, II «Б» кылаас.
***
Оҕо үлэҕэ кыра эрдэҕиттэн чугас дьонноруттан үөрэнэр. Ону сорох оҕолор сөбүлээбэттэр, сүрэҕэлдьииллэр. Ханнык баҕарар үлэни бары бииргэ саба түһэн оҥордоххо, кыайыылаах-хотуулаах эрэ буолаҕын. Ол иһин хас биирдии киһи үлэҕэ эппиэтинэстээхтик сыһыаннаһыахтаах. Кини үлэтинэн дьоҥҥо көмөлөһөрүн уонна кинилэри үөрдэрин өйдүөхтээх. Бу аахпыт кэпсээммэр оҕолор бэйэлэрин өйдөрүнэн итинник санааҕа кэлбиттэриттэн үөрдүм. Ийэлээх аҕалара олус муударайдар эбит дии санаатым.
Миша ПАВЛОВ, III «В» кылаас.
***
Капитолина Семёнова кэпсээнин ааҕан баран санаабын суруйуохпун баҕардым. Кэпсээҥҥэ оҕолор үлэни барытын тус-туспа сылдьан оҥороллор. Ол иһин кинилэргэ туох да табыллыбат, кыыһырсаллар. Онтон сүбэлэһэн баран бары бииргэ оҥорбуттарыгар барыта сатаммыт.
Бу кэпсээн бэйэ-бэйэҕэ көмөлөһөргө, үлэҕэ бииргэ тутуспутунан сылдьарга үөрэтэр. Кэпсээн ааптара барытын биир сүбэнэн оҥоруҥ, эйэлээхтик сылдьыҥ, оччоҕуна барыта табыллыаҕа диэн этиэн баҕарбытын мин өйдөөтүм.
Айаан СОРОВ, III «В» кылаас.
***
Бу кэпсээн элбэххэ үөрэтэр, толкуйдатар. Элбэх оҕолоох ыал оҕолоро кыһалҕаттан үөрэнэн, бэйэлэрэ толкуйдаан, дьиэ ис-тас үлэтин оҥорор буолбуттарын туһунан кэпсиир.
Дьиэ кэргэҥҥэ иллээх-эйэлээх буолуохтаахпыт. Бары биир сүбэнэн ылыстахпытына, хайдахтаах да ыарахаттары туоруохпутун сөп. Бииргэ төрөөбүт оҕолор кыраттан кыыһырса сылдьыа суохтаахтар. Бэйэ-бэйэлэригэр көмөлөһүөхтээхтэр.
Үлэһит оҕолордоох төрөппүттэр үлэлэрэ, түбүктэрэ кыччыыр, доруобуйаларын харыстыыллар, бэйэлэрэ сөбүлүүр дьарыктарыгар бириэмэлэрэ үксүүр. Дьоммут үлэлэриттэн сылайан кэллэхтэринэ, дьиэ үлэтин толорон, кинилэри үөрдүөхтээхпит.
Кыра эрдэҕиттэн үлэлии үөрэммит оҕо улааттаҕына, олоҕор чэпчэки буолар дииллэр.
Вика НОГОВИЦЫНА, III «В» кылаас.
***
Бу кэпсээни Капитолина Семёнова дьиэ ис-тас үлэтин этиспэккэ, мөккүспэккэ оҥорор, бииргэ төрөөбүт балтыларгыттан, бырааттаргыттан көҥөспөт буол диэн санааттан суруйбут. Дьиэ кэргэн иһигэр бэйэ-бэйэҕэ көмөлөһүү, бэйэ-бэйэни харыстааһын, истиҥ сыһыан баар буолуохтаах.
Лия ЕФИМОВА, III «В» кылаас.
Бу кэпсээн үлэни таптыырга, эйэлээх буоларга, бэйэ-бэйэҕэ истиҥник сыһыаннаһарга үөрэтэр. Мин дьиэ үлэтигэр көмөлөһөбүн: иһит, муоста сууйабын.
Оҕолоор, эһиги эмиэ ийэлээх аҕаҕытыгар көмөлөһөр буолуҥ!
Данил БОРИСОВ, III «В» кылаас.
***
Бу кэпсээни мин наһаа сөбүлээтим. Хас биирдии оҕоҕо, дьиэ кэргэҥҥэ сыһыаннаах дии саныыбын. Ийэлээх аҕалара атын диэриэбинэҕэ барбыттарын кэннэ оҕолор толкуйга түһэллэр. Саамай аһыммытым диэн – балтылаах бырааттара хам аччык хонон тураллар. Тус-туһунан астанан аһыыбыт диэн эдьиийдэрэ бэйэтигэр эрэ хааһы буһаран сиир. Салгыы маннык сатаныа суох диэн биир сүбэҕэ кэлэллэр, үлэлэрин барытын үллэстэн, иллээхтик-эйэлээхтик толороллор. Бу кэнниттэн дьиэҕэ бэйэ-бэйэҕэ истиҥ сыһыан, бэйэ-бэйэни харыстаһыы баар буолбут.
Мин дьиэбэр көмөлөһөбүн. Муоста сотобун, сибэккилэргэ уу кутабын. Бу — мин эбээһинэһим. Эдьиийбин кытта ийэбитигэр ас астыырга көмө буолабыт.
Оҕо кыра эрдэҕиттэн дьиэ үлэтигэр көмөлөһөр буоллаҕына, бу дьиэҕэ ыраас, сырдык буолар. Саамай кылаабынайа, оҕо үлэһит киһи буола улаатар. Онон дьиэ кэргэҥҥэ сылаас сыһыан баар буолара биһигиттэн, оҕолортон эмиэ тутулуктаах.
Валерия ВАСИЛЬЕВА, III «В» кылаас.
***
Мин санаабар, оҕолор төрөппүттэрин көрөн үлэлииргэ үөрэнэллэр. Кыра эрдэҕиттэн үлэни көрө улааппыт оҕо сүрэҕэлдьээбэт буолар.
Бу кэпсээҥҥэ төрөппүттэрэ оҕолорун эрдэттэн үлэлии үөрэппэтэхтэр. Улахаттары убаастаабат, бэйэмсэх гына ииппиттэр. Ыал улахан оҕото үлэтин сөпкө аттаран толоруохтаах этэ. Хааһыны бэйэтигэр эрэ астаан бэйэмсэҕин, аһыныгаһа суоҕун көрдөрдө. Мин эмиэ ыал улахан оҕотобун. Бу кэпсээни ааҕан баран, ыал улахан оҕото буоларым быһыытынан дьиэ күннээҕи үлэтиттэн сылтаан этиһии, мөккүһүү тахсыбатын туһугар кыһаллыахтаахпын, балтыларбар, бырааттарбар холобур буолуохтаахпын диэн өйдөөтүм. Биһиги төрөппүттэрбит хаһан даҕаны сүрэҕэ суох оҕолордоохпут диэн хомойуохтара суоҕа.
Айсена НИКОЛАЕВА, III «В» кылаас.
***
Бу кэпсээни ааҕан баран элбэҕи өйдөөтүм. Эн көмөлөспөт буоллаххына, эйиэхэ даҕаны, дьиэ кэргэҥҥэ даҕаны үчүгэй буолбат. Ийэҕэр, аҕаҕар, убайгар, эдьиийдэргэр көмөлөһүөхтээххин. Дьиэ үлэтин этиспэккэ, мөккүспэккэ оҥоруохтааххын. Үлэ киһини үчүгэйгэ үөрэтэр. Бары бииргэ тутуспутунан сырыттаххына, үлэ түгэнник бүтэр.
Юлиана ПОСЕЛЬСКАЯ, III «В» кылаас.
***
Мин бу кэпсээни ааҕан баран, суруйааччыны кытта сөпсөһөбүн. Кырдьык, үлэһит оҕолоох ыалтан оннооҕор уот үөрэр. Оҕолор бастаан ийэлээх аҕаларыгар көмөлөспөттөр. Онтон дьоно барбыттарын кэнниттэн кинилэр бэйэлэрэ толкуйдаан дьиэни-уоту хомуйар, астарын астыыр буолаллар. Оҕолор бэйэлэрэ итинник санааҕа кэлбиттэрэ үчүгэй.
Виолетта ХАТЫЛЫКОВА, III «В» кылаас.
***
Бу кэпсээн бииргэ төрөөбүттэргин кытта эйэлээх, истиҥ сыһыаннаах буол диэн үөрэтэр. Дьиэ кэргэҥҥэ этиһии-охсуһуу суох буоллаҕына, бары үөрэ-көтө олоруохпут.
Аман КИРИЛЛИН, III «В» кылаас.
***
Ийэҕэ, аҕаҕа көмөлөһүөххэ наада. Оҕолор иллээхтик биир сүбэнэн үлэлиир буолбуттара үчүгэй. Мин дьоммор көмөлөһөбүн. Иһит, муоста сууйабын, ас астыыбын. Эбээм иистэнэригэр иннэтигэр сап угабын, төлөпүөнүн туһанарыгар көмөлөһөбүн, ыйан-кэрдэн биэрэбин.
Дьиэ кэргэҥҥэ бэйэ-бэйэҕэ көмөлөһүү, харыстааһын, истиҥ сыһыан баар эрэ буоллаҕына, олохпут сырдык буолар.
Артём АТЛАСОВ, III «В» кылаас.
***
Мин бу кэпсээни ааҕан баран, убайдарбын кытта өссө эйэлээхтик сыһыаннаһыахпын баҕардым. Билигин дьиэ кэргэммитигэр оҕолор үһүөбүт. Улахан убайым Дима, орто убайым Илиан уонна мин. Кэпсээни ааҕан баран, дьиэбитин наһаа үчүгэйдик хомуйдубут. Ийэбит онтон наһаа үөрдэ уонна биһигини хайҕаата. Мин бу кэпсээни ааҕан баран ийэҕэ, аҕаҕа наар көмөлөһө сылдьар суолталааҕын өйдөөтүм.
Люба ИГНАТЬЕВА, III «В» кылаас.
***
Мин санаабар, бу кэпсээни оҕолор эйэлээхтик олордуннар диэн айбыттар. Сөбүлээн аахтым. Дьиэ кэргэҥҥэ эйэ, истиҥ сыһыан куруук баар буоллун!
Дайаана ЯКОВЛЕВА, III «В» кылаас.
***
Убайбынаан Арсенийдыын ийэлээх аҕабытыгар көмөлөһөбүт. Дьиэ үлэтин үллэстэн оҥоробут. Иккис этээһи хомуйуу, иһити сууйуу – биһиги эбээһинэспит. Бастаан иһити сууйарга, дьиэни хомуйарга ийэбитигэр көмөлөһөр эрэ этибит. Билигин барытын бэйэбит оҥоробут. Көрдөххө, боростуой курдук эрээри, ханнык баҕарар үлэҕэ үөрэниэххэ наада.
Витя ПОРТНЯГИН, III «В» кылаас.
***
Бу кэпсээҥҥэ биир нэһилиэккэ олорор ыал олоҕо көстөр. Кинилэр икки уол, икки кыыс оҕолоохтор. Оҕолоро ким ханнык үлэни толоруохтааҕын туһунан күнү быһа аахсаллар, төрөппүттэрин хомотоллор эбит. Ол гынан баран сүбэлэһэн үлэлэрин үллэстэн оҥорор буолбуттар. Ийэлээх аҕалара онтон олус үөрбүттэр. Ийэ, аҕа оҕолоруттан үөрэрэ диэн олус да үчүгэй!
Константин СЛЕПЦОВ, III «В» кылаас.
***
Мин ийэбэр соҕотох оҕобун. Кини миигин дьиэ ис-тас үлэтигэр кырабыттан үөрэппитэ. Ийэм үлэлээн, сылайан кэлэригэр дьиэбин-уоппун хомуйабын, иһиппин сууйабын, таҥас ыйыыбын. Бу кэпсээҥҥэ оҕолор бииргэ төрөөбүт элбэх эрээрилэр сүрэҕэлдьээн дьиэ үлэтин сүгүн оҥорботтор, этиһэллэр.
Мин санаабар, хас биирдии ыалга бэйэ икки ардыгар көмөлөһүү, өйөһүү, истиҥ сыһыан баар буолуохтаах.
Антон ЯКОВЛЕВ, III «В» кылаас.
***
Кэпсээни сөбүлээн аахтым. Кистэлэ суох, убайбынаан сороҕор дьоммутугар көмөлөһөрбүтүн сүрэҕэлдьээччибит. Бу кэпсээни ааҕан баран, элбэҕи өйдөөтүм. Ийэм куруук этээччи: «Үлэ киһини киэргэтэр», — диэн. Аҕам наар: «Убайгынаан иллээх буолуҥ», — диир. Ону мин аахайааччым суох.
Иллээхтик бары бииргэ үлэлээтэххэ, киһи сылайбат, үлэ түргэнник бүтэр.
Бу оҕолор сыыһаларын бэйэлэрэ өйдөөбүттэрэ хайҕаллаах. Төрөппүттэригэр эрэ буолбакка, бэйэлэригэр эмиэ үчүгэйи оҥордулар. Оҕолор бары биир санаанан үлэлии үөрэннилэр.
Мантан ыла убайбынаан иллээхтик дьоммутугар көмөлөһөбүт. Ийэлээх аҕам маны көрөн олус үөрэллэр. Оһохтоохпут буоллар уот эмиэ үөрүө этэ.
Олеся ОХЛОПКОВА, III «В» кылаас.
***
Бу кэпсээҥҥэ оҕолор сүрэҕэлдьээн төрөппүттэригэр көмөлөспөттөр. Кинилэри хомотоллор. Төрөппүттэрэ муударай буоланнар, оҕолорун мөхпөккө эрэ үлэни кыайар гына иитэллэр. Мин онтон үөрдүм.
Бу кэпсээни ааҕан баран оҕолор дьоммутун куруук үөрдэ сылдьыахпытын баҕардым.
Тимур НИКОЛАЕВ, III «В» кылаас.
***
Оҕолор ийэлээх аҕаларыгар көмөлөһүөхтээхтэр дии саныыбын. Эдьиийбинээн дьиэ үлэтин үллэстэн, уочаратынан толоробут. Мин дьиэ хомуйабын, быыл сотобун, иһит сууйабын, таҥас ыйыыбын, өтүүктүүбүн, балтыбын аралдьытабын, муоста харбыыбын, сибэккигэ уу кутабын, ыппын аһатабын. Ийэлээх аҕам үлэлэриттэн сылайан кэлэллэр. Ол иһин көмөлөһүөхтээхпит. Дьиэ үлэтин толорор бэйэбэр туһалаах дии саныыбын.
Айыына КИРИЛЛОВА, III «В» кылаас.
Хомуйан бэлэмнээтэ Полина Алексеевна Сивцева, педагог-бибилэтиэкэр,
17 №-дээх орто оскуола, Дьокуускай.