Бу нэдиэлэҕэ улахан кылаас оҕолоро оскуола үлэһиттэрин кытта араас субботниктарга сырыттылар. Сылгыбыт базатыгар Тарҕанаҕа күрүөтүн ремоннаан, саҥардан тутарга диэн анаан мас бэлэмнэстилэр. Үлэһиттэр оскуолаҕа бэрэбинэ бэлэмнээтилэр. 8 кылаас үөрэнээччилэрэ бастакы учууталларыгар Анна Еремеевнаҕа муус уган көмөлөстүлэр. 10 кылаас үөрэнээччилэрэ үгэс буолбут тимуровскай үлэлэрин Даалҕаан учаастагар баран сэрии сылын оҕотугар, тыыл уонна үлэ ветераныгар Елена Христофоровна Слепцоваҕа мас хайытан, саһааннаан көмөлөстүлэр.
Кинилэр көмөлөрүн туһунан Елена Христофоровна махтанан суруйда: «Бүгүн ол эбэтэр муус устар 26 күнүгэр, Арыылаах агро орто оскуолатын 10 кылааһын үөрэнээччилэрэ салайааччыларын, оскуола дириэктэрин иитэр үлэҕэ солбуйааччыта Айталина Ильинична Бурнашева буоланнар биһиэхэ Даалҕаан учаастагар тыыл, үлэ бэтэрээнигэр Елена Христофоровнаҕа кэлэн, маспытын хайытан саһааннаан бардылар. Кырдьаҕас киһи мин үөрүүм муҥура суох. Оҕолор барахсаттарга чуолаан Денис Саян Аммосовтарга, Егор Слава Ефимовтарга, Семён Неустроевка уонна икки кэрэчээн кыргыттарга Дуня Слепцоваҕа, Вика Потаповаҕа , Даалгааннар ааттарыттан улахан махталбытын ыытабыт! Өссө да маннык үлэни өрө тутан кырдьаҕас дьоҥҥо көмөлөһө, өйүү тута сылдьыҥ диэн баҕа санаабын этэбин. Дьоллоох, үөрэхтээхдьон буолуҥ! Махталы кытта сэрии сылын оҕото, тыыл, үлэ бэтэрээнэ Елена Христофоровна, Даалҕаан учаастага,26 04 24 сыл.»
Үлэнэн, субботниктарынан баай нэдиэлэ ааста. Аны сарсын, Өрөспүүбүлүкэбит күнүнэн сылгыбыт базатыгар, Тарҕанаҕа оттук маһы хайыта, саһаанныы бараллар.
Ол быыһыгар алын кылаас оҕолоругар «Здоровое питание — залог здоровья» кылаас чааһын, «Кто хочет стать отличником» өй оонньуутун ыыттылар.
Үлэни, үөрэҕи дьүөрэлии тутан Республиканскай олимпиадаҕа «Символы Якутии: Я — патриот» кытыннылар.
Илларион Старостин,
11 кылаас,
Арыылаах агрохайысхалаах орто оскуолата, Дьааҥы.