Үөрэх үлэһиттэрин быйылгы сүбэ мунньаҕа атырдьах ыйын 25-26 күнүгэр онлайн ньыманан ыытылла турар. Мунньахха өрөспүүбүлүкэ хайа баҕарар муннугуттан хас биирдии учуутал кыттыан сөп. Саҥа усулуобуйаҕа үөрэх хаачыстыбатын үрдэтии, иитии боппуруостарыгар үлэлэһии, кадрдары бэлэмнээһин, цифровой уларыйыылар, саҥа үөрэх ньымаларын туһунан киэҥ хабааннаах кэпсэтиилэр бара тураллар.
Үөрэх таһымын үрдэтиигэ иитии улахан оруоллаах. Оҕо, төрөппүт, учуутал биир ситимнээх үлэтинэн үтүө түмүк тахсар. Билиҥҥи усулуобуйаҕа, үөрэтии-иитии аныгы технологиянан бара турар кэмигэр, кылаас салайааччытын үлэтэ элбэҕи быһаарар. Кини сатабыллаах салайыытынан ааспыт үөрэх дьылын этэҥҥэ түмүктээбиппит. Балаҕан ыйын 1 күнүттэн кылаас салайааччытын хамнаһа үрдүүр. Ону сэргэ идэ таһымын үрдэтэр куурустар, идэтийбит куонкурустар, анал наҕараада, бэлиэ баара буоллар диэн учууталлар санааларын үлэһиннилэр. Кылаас салайааччытын үлэтин, ситиһиитин төрөппүттэргэ, оскуола сайтыгар, социальнай ситимнэригэр, улуус, өрөспүүбүлүкэ хаһыаттарыгар сырдатар үлэ ыытыллара былааннанар. Биһиги, «Кэскил» оҕо бэчээтин кыһатын үлэһиттэрэ, бу соругу үөрэ-көтө толорорго бэлэммит.
СӨ үөрэҕин үлэһиттэрин атырдьах ыйынааҕы сүбэ-мунньаҕар манан киирэн кыттыаххытын сөп https://minobrnauki.sakha.gov.ru/avgustovskoe-soveschanija-rabotnikov-obrazovanija-i-nauki-rsja.
Мария Иванова.