Улуу Кыайыы сүдү бэлиэтэ Кыайыы Знамята буолар. Бу Знамя 1945 сыллаахха ыам ыйын 9 күнүгэр Берлин куорат Рейхстагын үрдүгэр кытыастыбыта. Боронук бөһүөлэгэр олунньу 25 күнүгэр Кыайыы Знамятын долгуйан, үөрэн, өрө көтөҕүллэн туран көрүстүбүт.
Бу историческай суолталаах эстафетаны көрсүүгэ Үөһээ Дьааңы уонна Эбээн-Бытантай улууһун байыаннай хамыһаара Я.Н.Шумейко, Боронук нэһилиэгин баһылыга Н.В. Потапова, сэрии кэмин оҕото Р.А.Чирикова, Боронук бэтэрээннэрин сүбэтэ, учууталлар, үөрэнээччилэр кытыннылар.
Улуу Кыайыы Знамятын Үөһээ Дьааңы уонна Эбээн-Бытантай улууһун байыаннай хамыһаара Я.Н.Шумейко илиититтэн ылар чиэс Боронук орто оскуолатын «Төлөн» байыаннай-патриотическай кулууп иитиллээччилэригэр Антон Ефимовка (10 кыл.) уонна арыаллааччыларга Святослав Васильевка (10 кыл.), Василий Бережновка (10 кыл.) тигистэ.
Улуу Знамя биһиги оскуолабытыгар киирэригэр бары оҕолор уонна учууталлар тыыннаах эркин буолан иһийэн туран чиэстээтибит. Сэрии ыар тыына элбэх дьиэ кэргэн олоҕун аймаабыта, элбэх киһи сэриигэ ыңырыллыбыта. Ол курдук, Боронук нэһилиэгиттэн бэйэлэрин баҕа өттүлэринэн фроңңа барбыт саха ньургун уолаттара – биһиги биир дойдулаахтарбыт Семен Алексеевич Горохов, Кирилл Кириллович Слепцов уонна Захар Иннокентьевич Жирков сырдык ааттарын ахтан-санаан аастыбыт.
Ытыктыыр бэтэрээн учууталбыт, сэрии кэмин оҕото Розалия Андреевна Чирикова 1941-1945 сс. кэми Дьааңы дьоно-сэргэтэ сэрии кэмигэр ким туох кыахтааҕынан көмөлөспүтүн, кытаанах үлэнэн кыайыыны уһансыбыттарын кэпсээтэ. Кылыгырга Дьааңы сылгыларын үүрүү историятын сырдатта. Розалия Андреевна ийэтин бииргэ төрөөбүттэрэ сэрии саҕана аҕыс киһи баара бары ахсыан «Килбиэннээх үлэ иһин» мэтээли ылбыттар.
Биһиги, үүнэр көлүөнэ ыччат, “эбэлэрбит-эһэлэрбит өстөөҕү үлтүрүппүт сүдү холобурдарын өрүү өйдүү-саныы сылдьыахпыт” диэн туран «Төлөн» байыаннай-патриотическай кулууп хамандыыра Егор Юмшанов уонна Айысхаан Другин этиилэрин бары долгуйа иһиттибит.
Сэбиэскэй норуоту Кыайыыга кынаттаабыт буорах сыттаах хоһооннору 6, 11 кылаас үөрэнээччилэрэ доргуччу эттилэр. Норуот оччоттон баччаҕа диэри уоһуттан түһэрбэккэ сөбүлээн ыллыыр «Тыыннаахтар умнубат сыллара», «Эйэ, дьол иһин», «Катюша» ырыалары ыллаатыбыт.
Салгыы кылааһынан байыаннай ырыанан стройунан хаамыы курэҕэ буолла.
Ити курдук, биһиги оскуолабытыгар көңүл олох туһугар 1418 күннээх сэрии сырдык дьарылыга буолбут Кыайыы Знамятын көрүстүбүт, барыбыт өйбүтүгэр-сүрэхпитигэр умнуллубат өйдөбүнньүк буолан өрүү хаалыаҕа.
Ааптар: Лена ЗАБОРОВСКАЯ, 6 кылаас.