Бу ааспыт өрөбүллэргэ Саха сириттэн төрүттээх оҕолору киин тэлэбиидэнньэ “Звезда” уонна “Культура” ханаалларыгар көрөн үөрдүбүт.
Норуоттар сомоҕолоһууларын күн “Звезда” ханаалга Бүтүн Россиятааҕы “Юная звезда” ырыа куонкуруһа көһүннэ. Онно 9 саастаах Валерий Кузаков Саха Өрөспүүбүлүкэтин аатыттан кытынна. Кини Дьокуускайга төрөөбүт, билигин Подмосковьеҕа олорор. Ийэтэ Өлүөхүмэттэн төрүттээх.
Эдэр талааннары опера ырыаһыта Любовь Казарновская, “Ералаш” биэрии уус-уран салайааччыта Борис Грачевскай, артыыс Олег Масленников, “Новая звезда” кыайыылаахтара Александр Миронов, Юлия Фиминова сыаналаатылар.
Бу финалга 18 оҕо талыллан киирбититтэн, биһиги уолбут региоммут 14-с нүөмэринэн тахсан ыллаата. Муслим Магомаев “Синяя вечность” диэн лирическэй ырыатын толордо. Дьүүллүүр сүбэ киниэхэ 100 баалы туруорда уонна: “Үрдүк ноталары бэркэ ыллыҥ”, — диэн хайҕаата.
Түмүккэ мичээр аргыстаах Валерий Кузаков бастакы миэстэни Еврейскэй автономнай уокурук кыыһа Арина Кошелевалыын үллэһиннэ. Иккис миэстэҕэ Тываттан Кыргыс Ай Кыс буолла. Кабардин-Балкар сириттэн Дениза Хекилаева үһүстээтэ.
Аны сарсыҥҥы күнүгэр “Культура” ханаалыгар “Москва встречает друзей” диэн норуоттар икки ардыларынааҕы XV үбүлүөйдээх фестиваль аһыллыытыгар Саха сирин талааннаах кыысчаана Аида Филиппова кытынна. Кини норуодунай артыыс, ССРС уонна Россия Государственнай бириэмийэлэрин лауреата, дирижер Владимир Спиваков салайар “Виртуозы Москвы” камернай оркестрын кытта бииргэ фортепианоҕа оонньоото.
