Саламаат — саха төрүт аһа, ол гынан баран бу ханнык эрэ үөрүүлээх түгэҥҥэ, дьоро киэһэҕэ эрэ астанар ытык бүлүүдэ. Холобура, оҕо төрөөтөҕүнэ, уруу киэһэтигэр, дьиэ малааһыныгар, ыһыахха бу алгыстаах хааһы хайаан да остуол биир мааны аһа буолар. Састааба бэрт судургу эрээри, ылбычча мээнэ табыллыбат, манна сатабыл наада. Бүгүн эһиэхэ Таатта Дэбдиргэтиттэн саҥа тахсан эрэр блогер кыысчаан Влада Жулева саламаат астаан көрдөрөр.
«Кэскиллиин» кэккэлэс — Таатта улууһун Игидэй оскуолатын учуутала Варвара Константиновна Ефимова саҥа бырайыага. Кини саха тыыннаах тылын үүнэр көлүөнэҕэ тарҕатар, сайыннарар сыаллаах YouTube-канаалга сахалыы тыллаах блогер ыччаты иитэн таһаарар санаалаах. «Аныгы оҕолор хаһыаты, кинигэни ааҕыахтааҕар социальнай ситимнэргэ, YouTube-канаалга араас сериаллары, вайнары ордук көрөр, сэҥээрэр буоллулар. Инньэ гынан төрөөбүт тылларын да умна быһыытыйдылар. Үгүс кырачааннар оннооҕор тыа сиригэр бастаан нууччалыы саҥарар буоллулар. «Мультик, компьютер оҕото, ол иһин итинник», — дииллэр үгүстэр. Хайыыр да кыах суох, билигин оҕону эккирэтэн Интернекка киириэххэ наада, оччотугар эрэ тылбытын илдьэ хаалыахпыт, омук быһыытынан чөл буолуохпут. Сахалыы тыллаах YouTube-блогер оҕолору өйүөххэ, сайыннарыахха диэн ыҥырабын», — диэн санаатын үллэстэр бырайыак ааптара.
Бүгүн Дэбдиргэттэн Влада Жулева ийэтинээн Алексадра Семеновналыын саха төрүт аһын — арыылаах саламааты хайдах астыыры көрдөрүөхтэрэ. Бу видеоролик — Влада иккис үлэтэ. Көрүҥ, сыаналааҥ, лайкта туруоруҥ.
Бэйэ инф.