2024 сыл түмүгүнэн Н.Е. Мординов-Амма Аччыгыйа аатынан
«Кэскил» оҕо бэчээтин кыһатын бастыҥ юнкордара
Арассыыйа Бэчээтин күнүн чэрчитинэн, Н.Е. Мординов-Амма Аччыгыйа аатынан «Кэскил» оҕо бэчээтин кыһата 2024 сыл түмүгүнэн бастыҥ үлэлээх юнкордары чиэстиир. Кинилэр – суруйар, сырдатар үлэ диэн тугун билэр, үлэһит, эппиэтинэстээх, дьону кытта бодоруһары, кэпсэтэри сатыыр оҕолор. Ааспыт сыл устата өрөспүүбүлүкэ, улуус, нэһилиэк, оскуола олоҕун сырдатыыга, «Саас» мобильнай сыһыарыыга кылгас видеороликтары оҥорууга «Кэскил» медиа оскуолаҕа ортотунан 500-кэ оҕо дьарыктаммыта. 500-кэ оҕоттон сүүмэрдэммит 2024 сыл бастыҥ юнкордара кимнээҕий?

Вадим Колесов, XI кылаас,
А.П. Илларионов аатынан Хайахсыт орто оскуолата, Чурапчы:
– Мин юнкор буоламмын, биир кэмҥэ хас да үлэни тэҥҥэ тутан оҥорорго үөрэнним: интервью ылабын, суруйабын, видеоҕа устабын, хаартыскаҕа түһэрэбин, видеоролик оҥоробун, ааҕааччыга тиэрдэбин. Бу ылбыт билиим-көрүүм инники олохпор туһалыа дии саныыбын.
***

Света Заровняева, XI кылаас,
А.П. Илларионов аатынан Хайахсыт орто оскуолата, Чурапчы:
– Юнкор буоламмын дьону кытта сатаан алтыһарга, эппиэтинэстээх буоларга, ыстатыйа суруйан, дьоҥҥо-сэргэҕэ санаабын тиэрдэргэ үөрэнним.
***

Алена Ксенофонтова, VIII кылаас,
С.Д. Флегонтов аатынан Хадаар орто оскуолата, Чурапчы:
– Юнкор диэн чиэһинэй киһи. Кини кыбыстан, куттанан турбакка буола турар быһыыны-майгыны чиэһинэйдик сырдатар. Санаатын сөпкө сааһылаан, ааҕааччыга тиийэр гына суруйарга күннэтэ кыһаллыахтаах.
***

Вилена Стручкова, IX кылаас,
С.К. Макаров аатынан Чурапчытааҕы гимназия:
– Медиа үлэтэ олус сылаалаах, уустук. Ол гынан баран юнкор бэйэтэ баҕаран туран үлэлиир буоллаҕына, кини бу хайысхаҕа бэйэтин төһө баҕарар сайыннарыан сөп. Юнкор дьону кытта сатаан кэпсэтэр оҕо. Мин суруналыыс идэтин баһылыахпын баҕарар буоламмын, «Кэскил» медиа оскуолаҕа төрдүс сылбын сөбүлээн дьарыктанабын.
***

Туйаара Мамонтова, IX кылаас,
М.Н. Готовцев аатынан Танда орто оскуолата, Уус Алдан:
– Юнкор диэн олоххо көхтөөх оҕо. Оскуолаҕа эрэ буолбакка, олорор нэһилиэгэр туох буола турарын интэриэһиргиир. Кини сыаллаах-соруктаах, дьону ытыктыыр, кириитикэттэн куттаммат.
***

Гаврил Прокопьев, IX кылаас,
А.Е. Кралин аатынан Абаҕа орто оскуолата, Амма:
– Юнкор суруйбут сонуннара ааҕарга күндү, үчүгэй. Кини оҕобун диэн толлон турбакка, тулатыгар буола турары кырдьыктаахтык сырдатар. Юнкор суруйуулара ааҕааччылары үрдүккэ, кэрэҕэ сирдииллэр.
***

Эрчим Николаев, IX кылаас,
В.М. Новиков-Күннүк Уурастыырап аатынан Эмис орто оскуолата, Амма:
– Юнкор диэн, мин санаабар, олоххо буола турары чиэһинэйдик сырдатар оҕо. Юнкор буоллаххына, дьон ортотугар толлубакка сылдьарга, дьон санаатын истэ, ылына үөрэнэҕин. Мин «Кэскил» медиа оскуола юнкора буолуохпуттан ыла нэһилиэгим, оскуолам тэрээһиннэрин көтүппэккэ сырдатар буоллум. Улахан тэрээһиннэргэ сылдьан оҕолору кытары билсэн, кинилэри кытта тэҥҥэ үлэлээн элбэҕи биллим, сайынным. Элбэхтик суруйар буоллаххына, ылсыбыт үлэҕин тиһэҕэр тириэрдэр тулуурдаах, эппиэтинэстээх буолаҕын.
***

Илона Руфова, XI кылаас,
Өрөспүүбүлүкэтээҕи лисстэй-интэринээт, Дьокуускай:
— Төрөөбүт улууспут, бүтүн өрөспүүбүлүкэ сонуннарын, оннооҕор Норуоттар икки ардыларынааҕы тэрээһиннэри ийэ тылбытынан сырдатар, үөрүүгэ, сонуҥҥа кыттыһар суруналыыстыка эйгэтигэр сатабылы, билиини ылыыга улахан кыаҕы биэрэр.
***

Кирилл Волков, X кылаас,
Мииринэй куоратын 7 №-дээх орто оскуолата:
— Юнкор диэн үөрэнэр оскуолатын, төрөөбүт нэһилиэгин, куоратын, өрөспүүбүлүкэтин олоҕор актыыбынайдык кыттар уонна ону сырдатыыга, суруналыыстыкаҕа интэриэстээх оҕо. Араас түгэннэри кэтээн көрөн, информацияны хомуйан ону тулалыыр эйгэҕэ үллэстии буолар. Араас түгэннэри кэтээн көрөн, инфоромацияны хомуйар, үллэстэр. Олоххо бэйэни арыйыы, саҥа сүүрээн инники суруналыыстыка кэскилэ.
***

Мария Тищенко, X кылаас,
Лөгөйдөөҕү лиссиэй-интэринээт, Уус Алдан
– Юнкор сонуну бастакнан билэр, дьоҥҥо-сэргэҕэ тиэрдэр, анааран көрөн быһаарар уонна сиэр-майгы өттүнэн оҕолору сырдыкка, кэрэҕэ угуйар.
***

Алина Санникова, X кылаас,
Дүллүкү орто оскуолата, Үөһээ Бүлүү:
— Cонуну тута устан уонна суруйан куйаар ситимигэр, хаһыакка таһаарар. Улаатан эрэр оҕолорго үтүө холобур буолар, элбэххэ үөрэтэр.
***

Виолетта Левина, X кылаас,
Е.Е. Эверстов аатынан Кэбээйи орто оскуолата, Кэбээйи:
– Юнкор ыстатыйа суруйарга, хаартыскаҕа түһэрэргэ бэлэм буолар. Юнкор диэн саҥаттан саҥаҕа үөрэнии, элбэх дьону кытта алтыһыы; уопсастыба олоҕор кыттыһан, бэйэҥ санааҕын этинии; дьоҥҥо-сэргэҕэ биэрбит информацияҕар эппиэтинэһи ылыы.
***

Святослав Барабанов, VIII кылаас,
И.С. Гаврильев аатынан Нам орто оскуолата, Нам:
– Иһитиннэриини хомуйуу, сонуннарын суруйуунан дьарыктаныы – бу юнкор үлэтэ. Суруналыыстыкаҕа уопуттаах уонна дьоҕурдаах, бэйэлэрин карьераларын салгыы сайыннарарга сөптөөх үөрүйэх буолар.
***

Алина Григорьева, XI кылаас,
М.Е. Васильев аатынан 2 Малдьаҕар орто оскуолата, Хаҥалас:
– Юнкор буолар диэн оскуолаҕа үөрэнэр кэмҥэ туһалааҕынан дьарыктаныы, оскуола тэрээһиннэрин өрөспүүбүлүкэ киэҥ эйгэтигэр сырдатыы, саҥаттан саҥаҕа үөрэнэн иһии, үгүс дьону кытта алтыһыы. Өрөспүүбүлүкэбитигэр оҕолорго аналлаах улахан тэрээһиннэргэ сырдатыыга көмө буолуу, ураты эйгэҕэ бэйэ кыаҕынан холонуу.
***

Лидия Алексеева, IX кылаас,
Алдан лиссиэйэ, Алдан:
– Юнкор – бары өттүнэн сайдыылаах, туохтан да чаҕыйбат, киириилээх-тахсыылаах, кэпсэтинньэҥ, өрүү үөрэ-көтө сылдьар.
***

Александр Леоненко, X кылаас,
Петропавловскай орто оскуолата, Уус Майа:
Юнкор хорсун буолууну, кырдьыкка талаһыыны, сонуну таба көрүүнү ордук сатыахтаах. Кини хас биирдии сүрэххэ суол хаалларар суолталаах. Юнкор – сайдыы уонна инники олох.
***

Сайаана Терехова, X кылаас,
Е.Е. Эверстов аатынан Кэбээйи орто оскуолата, Кэбээйи:
– Юнкор буолуу дьиҥнээх улахан үлэни, баҕа санааны эрэйэр. Кини дьону кытта тапсар, аһаҕастык саҥарар, кыбыстыбат. Өрөспүүбүлүкэбит сонуннарын сырдатыы, дьоҥҥо-сэргэҕэ тарҕатыы, саҥаттан саҥаҕа үөрэнии – юнкор эбээһинэһэ.
***

Сайыына ТОБОНОВА, XI кылаас,
Маар орто оскуолата, Ньурба:
– Мин «Кэскилгэ» юнкор буолбутум сылтан орто. Суруналыыстыканы сөбүлүүбүн, араас интэриэһинэй дьону кытта билсиһиэххин сөп, элбэх саҥаны, сонуну билэҕин.
***

Карнелия Исагалиева, IX кылаас,
Б.Н. Егоров аатынан Күндэйэ орто оскуолата, Сунтаар:
– Юнкор элбэҕи билэр, баай тыллаах, билэрэ-көрөр элбэх, дойдутун туһунан барыларыгар тиэрдиэн баҕарар оҕо. «Кэскил» оҕо бэчээтин кыһатыгар үчүгэй хаачыстыбаларбын ыйан сайыннарарга көмөлөспүттэригэр ис сүрэхпиттэн махтанабын.
***

Нария ХОЮТАНОВА, X кылаас,
Г.Д. Бястинов-Бэс Дьарааһын аатынан Чымынаайы орто оскуолата, Таатта:
– Юнкор диэн баай тыллаах-өстөөх, билэрэ-көрөрө элбэх, дьону кытта биир тылы булар. Олоххо буола турары билэр, сэҥээрэр, ырытыһар кыахтаах уонна бэйэтэ кэтээн көрбүтүн дьону кытта үллэстэр буолуохтаах. Мин юнкор буолан тураммын олус элбэҕи биллим-көрдүм. Миигин бу идэҕэ уһуйбут «Кэскил» оҕо бэчээтин кыһатыгар улахан махталбын тиэрдэбин.
***

Алена ФЕДОРОВА, XI кылаас,
И. Г. Тимофеев аатынан Майа лиссиэйэ, Мэҥэ Хаҥалас:
– Юнкор диэн айар дьоҕурдаах, билиигэ-көрүүгэ талаһар оҕо. Олорор нэһилиэгин уопсастыбаннай олоҕор көхтөөх кыттыыны ылар. Юнкор оҕолортон сорохторо суруналыыс буола улаатыахтара. Юнкордар олоҕу туталлар.
***

Дайаана НАХОВА, IX кылаас,
Н.Н. Каратаев аатынан Тааһаҕар орто оскуолата, Бүлүү:
– «Кэскил» хаһыакка юнкор буолбутум үһүс сылыар барда. Бу кэм устата суруналыыс идэтин олус интэриэһиргээтим. Ордук интервью, хаартыскаҕа түһэрии, видеомонтаж хайысхатын сөбүлээтим. Юнкор буоларым санаабын сааһылаан этэргэ, дьон санаатын истэргэ, ону ааҕааччыга, истээччигэ сөпкө тиэрдэргэ үөрэтэр. Туспа толкуйдаах, буола турарга түргэнник ылсыһар, эппиэтинэстээх, тулуурдаах, ааҕаргын-суруйаргын сөбүлүүр буоллаххына, суруналыыс идэтэ — ЭН ИДЭҤ.
***

Оксана Пермякова, Х гуманитарнай кылаас,
Өрөспүүбүлүкэтээҕи лиссиэй-интэринээт, Дьокуускай:
– Юнкор диэн уран тыллаах-өстөөх, киэҥ билиилээх, киһи болҕомтотун тардар гына суруйар уонна олоххо актыыбынай позициялаах.
***

Алгыстаана ЗАХАРОВА, VIII кылаас,
25 №-дээх оскуола, Дьокуускай:
– 2023 сыл кыһыныттан медиа суруналыыстыканан утумнаахтык дьарыктанабын. Бу идэни олус интэриэһиргиибин. Тоҕо диэтэххэ, ыстатыйалары суруйарбын уонна саҥа дьону кытта билсэрбин сөбүлүүбүн.
***

Арина КО, VIII кылаас,
2 №-дээх оскуола, Дьокуускай:
– Суруналыыстыкаҕа саамай ордорорум диэн бэйэм санааларбын сурукка тиһэн дьоҥҥо тиэрдии буолар. Онон медиакииҥҥэ үлэлиирбэр суруйарбын ордук сөбүлүүбүн. Бу идэ миэхэ номнуо олоҕум сорҕото буолар: дьон, иэйии, сайдыы.
***

Олеся Турлакова, VIII класс,
Дьокуускайдааҕы глобальнай үөрэхтээһин киинэ:
– Юнкор ааҕарын, суруйарын сөбүлүүр, сонуну үллэстэр. Төрөөбүт куоратын, өрөспүүбүлүкэтин, дойдутун сайдыытыгар бэлиэ сонуннары сырдатан бэйэтин кылаатын киллэрэр.
***

Татьяна ИВАНОВА, XI кылаас,
Н.И. Кочнев аатынан 1-Хаҥалас орто оскуолата, Ньурба улууһа:
– Суруналыыстыкаҕа кыттыспытым 3-с сылыгар барда. Бэйэм баҕабынан киирэммин астына сылдьабын. Ыстатыйа суруйабын, саҥа дьону кытта билсэн интервью ылабын, элбэх тэрээһиннэргэ сылдьабын, саҥа сирдэри кэрийэбин уонна куруук бэйэбэр саҥаны арыйабын. Салгыы бу хайысханан сайдан, улаатан, элбэҕи билэн иһиэхпин баҕарабын.
***

Валерия Романова, Х кылаас,
Чыамайыкы, Мэҥэ Хаҥалас:
– Юнкор диэн дойду инники кэскилэ. Мин юнкор буоламмын олус элбэҕи ситистим уонна инникитин да ситиһиэм, үүнүөм-сайдыам, саҥа саҕахтары арыйыам.
***

Надежда Петрова, Х кылаас,
3 №-дээх оскуола Покровскай орто оскуолата, Хаҥалас:
– Мин санаабар, баҕалаах буоллаххына, ким баҕарар юнкор буолуон сөп. Юнкор диэн көннөрү баһылаабыт дьарыгым эрэ буолбатах, бу – мин дууһам ымыыта!
***

Күннэй Карманова, XI кылаас,
Дьокуускайдааҕы Арктическай оскуола:
– Суруналыыстыка киһи айар дьоҕура сайдар, толкуйдуу уонна бэйэ санаатын этэ үөрэнэр идэтэ.
2024 сыл түмүгүнэн Н.Е. Мординов-Амма Аччыгыйа аатынан»Кэскил» оҕо бэчээтин кыһатын бастыҥ юнкордарын, кинилэр салайааччыларын, куратордарын эҕэрдэлиибит.
keskil14.ru