Өрүү буоларын курдук, үөрэх сылын биир күүтүүлээх улахан тэрээһинэ Т.Е. Сметанин төрөөбүтэ 100 сылыгар ананна. Сарсыардаттан оҕо ыһыаҕар тэринэн, сир симэхтэрин, кыргыттар үҥкүүлэриттэн саҕалаатылар, Екатерина Яковлевна айылҕаҕа быырпах ыһан алҕаата, кэлбит дьоҥҥо айах туппутун кэннэ төрүт культура уонна музыка учуутала Матрена Павловна Килижекова тойук туойда.
Бу кэнниттэн Т.Е. Сметанинна аналлаах фольклорга күрэс саҕаланна. Хамаандалар оҕолоро инники туох да бэлэмэ суох, кыһын билбит, үөрэппит көрүҥнэрин тахсан толорон истилэр. Элбэх толорооччулартан муҥутуур кыайыылаахтарынан, хоһооҥҥо – Дьяконова Дайаана, норуот ырыатыгар Кондакова Варя, чабырҕахха Дьяконова Надя, хомуска оонньууга Лепчикова Лилиана, олонхоҕо Полятинская Света үҥкүүгэ учууталларбыт Акулина Егоровна уонна Вера Васильевна Т.Е. Сметанин «Бу Лена» хоһоонунан дьүһүйүүлэрэ ааттанна. Фольклор күрэһэ Дария Алексеевна Гуляева уонна Матрена Павловна оһуохайдарынан түмүктэммитэ.
Күрэс кэнниттэн буойун — суруйааччыбыт оҕо сааһын аатынан «Быһыйа» күрэҕэ саҕаланна. Манна хапсаҕайга кыра кылаастарга Сыроватскай Арылхан, орто сүһүөххэ Корякин Айаан, улахаттарга Дьяконов Алеша; мас тардыьыытыгар кыра кылаастарга Охлопков Айсен, ортоҕо ыалдьыппыт Ноговицын Еремей, улахаттарга Дьяконов Коля кыайаннар хамаандаларын чиэстээхтик көмүскээн, бастакы миэстэни «Тимуровецтар», иккиһи — «Валя Котик», үсүһү – «Орленок» хамаандалар ыллылар.
Сыл аайы ыытыллар «Зарница» оонньуубут суруйааччыбыт «Егор Чээрин» айымньытыгар уонна Советскай кэмҥэ баар буола сылдьыбыт Пионерскай тэрилтэ олохтоммута 95 сылыгар олоҕурбут. Бастаан парадтаатыбыт, ааппытын ол кэмнээҕи өйдөбүллэринэр таллыбыт, девиз, речевка, ырыа көмүскээтибит. Манан урут дьоннорбут олохторун историятын сэгэтэн көрдүбүт. Айымньы ис хоһоонунан булугас өйдөөх, хорсун Егор Чээрин, снайпер Шагуров, повар Бычков буолан ылаттаатыбыт. Уопсай түмүгүнэн «Тимуровец» хамаанда — бастакы, иккис — «Валя Котик», үһүскэ «Орленок» хамаанда тигистибит.
Бу кун хамаанда оҕолоро бары бииргэ түмсэн, кыраларбытын оҕолоон, олус эйэлээхтик оонньоон астынан араҕыстыбыт. Баай ис хоһоонноох, көрдөөх оонньууну тэрийбиттэригэр учуталларбытыгар махтанабыт.
Ааптар: Полятинская Света, Кэбээйи улууһун Н.Х.Дьяконов аатынан Тыайа орто оскуолатын 6 кылааһын үөрэнээччитэ