Соторутааҕыта “Сосновый бор” оҕо сынньалаҥ уонна чэбдигирии киинигэр IV өрөспүүбүлүкэтээҕи“Арктика оҕолорун оонньуулара” буолан ааста.
Бу тэрээһин инники сылларга сайыҥҥы кэмҥэ ыытыллара. Оттон быйыл кулун тутар тымныы күннэригэр буолла. Анаабыр, Нерюнрги, Өлөнүөк, Томпо, Эбээн Бытантай, Кэбээйи улуустарыттан оскуола үөрэнээччилэрэ кыттыыны ыллылар. Оҕолор эбэҥкилии футболга, ноорины тутууга, маамыктаны быраҕыыга, хотулуу хапсаҕайга уонна наартаны ойууга күөн көрүстүлэр. Бары төрүт таҥастарын бойбоччу кэтэн, тобуктарыгар тиийэ тирии этэрбэстэрин анньынан кыайыы туһугар туруулаһа сылдьалларын көрүөххэ астык.Уопсай түмүккэ Виталий Петров тренердээх Эбээн Бытантай улууһа I миэстэ буолары ситистэ. II-с бочуоттаах миэстэҕэ Анаабырдар таҕыстылар (тренер Сааскылаана Кылтасова). Нерюнрги улууһуттан “Арктика” экспериментальнай оскуола-интэринээт хамаандата үһүстээтэ (тренер Валентин Алексеев). Оҕолор ситиһии кынаттаах үөрэн-көтөн дьиэлээтилэр.
«Арктика оҕолорун оонньууларын» туһунан сиһилии “Кэскил” хаһыат кэлэр нүөмэригэр ааҕыҥ.
Ааптар: Вера Петрова