Оскуолаҕа үөрэнэр бүтэһик сылбыт түмүктэнэрэ бу тиийэн кэллэ. Бириэмэ түргэнник да ааһар, бэҕэһээ эрэ бастакы кылааска үөрэнэ киирбит курдук этибит, оттон бүгүн — оскуоланы бүтэрэн эрэр улахан дьон буоллубут.
Оскуолабытын кытта быраһаайдаһабыт. Каникулга курдук, үс ыйга эрэ буолбатах, букатыннаахтык арахсабыт. Арай хойут бииргэ үөрэммиппит хаһыс эмэ сылын бэлиэтии эбэтэр оскуолабыт үбүлүөйүгэр кэлиэхпит. Кэлин, төрөппүт быһыытынан, оҕолорбутун кытта араас тэрээһиннэргэ кэллэхпитинэ, оскуолабытыгар туох ханнык уларыйыы буолбутун интэриэһиргээн көрүөхпүт…
Оскуолаҕа атаарбыт кэмим олус күндү, өрүүтүн сүрэхпэр баар. Манна аан бастаан паартаҕа олорбутум, аан бастаан ааҕарга, суруйарга, суоттуурга үөрэммитим, элбэх доҕоттордоммутум. Наһаа да үчүгэй кэмнэр этилэр: бары киэһээ аайы бииргэ киинэ көрөрбүт, саас аайы похуокка барарбыт, араас күрэхтэһиилэргэ кыттарбыт. Хомолтолоох да күннэр, биллэн турар, бааллара, ол эрээри дьоллоох күннэр өссө элбэх этилэр.
Оскуола – улахан олоххо киириибит бастакы үктэлэ. Ол иһин оскуолабар ис сүрэхпиттэн махтанабын уонна долгуйан туран этэбин: “Быраһаай, оскуолам барахсан!”
Ааптар: Айыына Маркова, “Кыымчаан” эдкорпост.
Табаҕа, Мэҥэ Хаҥалас