«Инникигэ хардыы» эдэр чинчийээччилэр кэмпириэнсийэлэригэр Таатта улууһун Ытык Күөл лиссиэйиттэн Айсена Бястинова кыттар.
— Мин 5 Б кылааска уерэнэбин. Быйыл оскуола үрдүнэн буолбут НПК күрэҕэр «Безнадзорные собаки» диэн тиэмэнэн кыттыбыттым. Биһиги нэһилиэкпитигэр наһаа элбэх бэйдиэ ыттар бааллар, уулуссаҕа сылдьарга кутталы үөскэтэлэр. Интэриэһиргээн администария үлэһититтэн ыйыталаспыппар Ытык Күөлгэ уопсайа 2452 ыал олорор, онтон 1695 ыал чааһынай дьиэлээхтэр эбит. Ветеринарнай участакка 402 эрэ ыт регистрациялаах. Ол — регистрацията суох сылдьар ыттар баалларын көрдөрөр. Бу сыл иһигэр 45 киһи ыкка ытыттаран, балыыһаҕа көрдөрөн эмтэммиттэр. Ветеринарнай участакка бу сыл күһүнүттэн чипирование оҥороллор. Бу, мин санаабар, ыттары бэлиэтиир саамай наадалаах ньыма. Ол эрээри буор босхо оҥоһулларын да үрдүнэн 95 эрэ ыкка туруоруллубут. Бу чип ыт сүттэҕинэ, хаһаайынын буларга, быһыы (прививка) ылбытын барытын көрдөрөр. Күһүҥҥүттэн биһиги нэһилиэкпитигэр П.И.Васильев бэйдиэ сылдьар ыттары тутар, 30 күн хаайар пууну арыйбыт. Ол үлэлиэҕиттэн 11 ыт хаһаайыннарыгар төннүбүт, 8 ыт оҕото саҥа хаһаайыннаммыт. Сорох ыттары укуоллатан төттөрү ыыппыттар.
Дьон хайдах бэйдиэ ыттарга сыһыаннаһалларын билээри, ыйытык ыыппыппыт. 95% куттаналлар, 91% эрэйдээбэккэ суох оҥорууну ирдииллэр. Ким да уулуссаҕа сылдьар ыты ылыан баҕарбат эбит. Мин бу үлэбинэн нэһилиэгим олохтоохторун ыттарыгар эппиэтиннэстээхтик сыһыаннаһан чип туруортаран, сыапка эбэтэр аналлаах килиэккэҕэ туруоруохтарын ситиһиэхпин баҕарабын. Уулуссаҕа бэйдиэ сылдьар ыттартан куттаммакка, дьон сатыы көҥүл сылдьыахтарын баҕарабын.