Быйыл Амма улууһугар «Инникигэ хардыы» кэнпириэнсийэ ыытыллыбыта 25 сыла буолла. Онон быйылгы тэрээһин үбүлүөйгэ түбэһэн, бэрт тэрээһиннээхтик Бөтүҥ оскуолатыгар ыытылынна.
Биһиги оскуолабытыттан 8 оҕо кытынна. Ол курдук, тыа хаһаайыстыбатын, уопсастыбаннай билим, устуоруйа уонна кыраайы үөрэтии, саха билэлиэгийэтин хайысхатыгар араас тиэмэлээх үлэ суруйдулар.
Ахсынньыбыт аан-даам тымныыта хаайан, сирэй тиийэн кыттыбакка, ыраахтан кытыннылар. Зуум ситимин нөҥүө экспиэрдэргэ санааларын көмүскээн, ыйытыыларга хоруйдаан, бустулар-хаттылар.
Түмүккэ 5 оҕо үлэтэ биһирэнэн, дипломҥа тигистэ. 10 кылаас үөрэнээччитэ Богдан Бубякин “Күн эргиирэ” диэн сайыҥҥы мастарыскыай туһунан бырайыага 3 истиэпэннээх диплом (салайааччы Бубякина Л.В.), Петя Платонов (10 кылаас) “Подростковая самозанятость” диэн бэйэ оҥоһуктарын атыылаан дохуот киллэрбитин туһунан дакылаата 3 истиэпэннээх диплом (салайааччы Захарова Е.П.), Дария Чемезова (11 кылаас) “Эмис нэһилиэгэр үөрэхтээһин саҕаланыыта” диэн оскуолабыт 100 сааһын көрсө бэрт кэрэхсэбиллээх үлэ оҥорон, эмиэ 3 истиэпэннээх диплом (салайааччы Гаврильева А.Н.), Константинова Анита (10 кылаас) саха билэлиэгийэтигэр Эмис олоҥхотун үөрэтии устуоруйатын чинчийэн, 1 степеннээх дипломунан бэлиэтэннэ, итиэннэ өрөспүүбүлүкэтээҕи түһүмэххэ кыттарга мэктиэлэннэ (салайааччы Захарова Н.К.). Маны таһынан 5 кылаастан Катя Захарова уонна Айта Захарова, 6 кылаастан Алгыстаан Пестерев бастакыларын кыттан, күүстэрин холонон көрдүлэр.
«Кэскил» медиакиин, Эмис орто оскуолата,
Амма улууһа.