Ахсынньы 20–21 күнүгэр Дьокуускай куоракка Ил Дархан Харыйатын тэрээһинэ ыытыллар. Амма улууһун Мээндиги орто оскуолатын 11 кылааһын үөрэнээччитэ Попова Виктория кыттар чиэскэ тигистэ. Мин Викторияттан ыйытыыга хоруйдууругар көрдөстүм.
Бу улахан тэрээһиҥҥэ ыҥырыллан баран эрэргиттэн төһө долгуйаҕыный?
– Мин олус долгуйабын. Арассыыйатааҕы олимпиадалар, кэмпириэнсийэлэр кыайыылаахтара, бастыҥ спортсменнар, туйгун үөрэхтээх оҕолор ахсынньы 21 күнүгэр Саха Циркэтин дьиэтигэр мустабыт. Бу күн миэхэ ураты кэтэһиилээх күн буолар. Икки харыйаҕа Ил Дархан уонна ХИФУ Ректорскай харыйаларыгар сылдьыахтаахпын.
Ил Дархан Харыйатыттан тугу кэтэһэҕиний, күүтэҕиний?
– Ил Дархан харыйатын тэрээһинэ Саха циркэтигэр буолар, ол иһин саҥа дьыллааҕы представлениялары көрүөхпүн баҕарабын. Республика араас муннугуттан мустубут оҕолор, остуоруйа алыптаах дойдутугар баар буолуохпут дии саныыбыт.
Ректорскай харыйаҕа хайдах талылынныҥ? Туох ситиһиилээх оҕолору талалларый?
– СВОШ, ВСОШ олимпиадаларыгар элбэхтик кытыннаххына, миэстэлэстэххинэ ыҥыраллар. Мин араас олимпиадаларга ситиһиилээхтик кыттыбытым.
Бу буолаары турар тэрээһиҥҥэ чугас доҕотторгуттан бааллар дуо?
– Үтүө үгэскэ кубулуйбут, сылын ахсын Саха циркэтигэр ыытыллар кэрэ тэрээһин, өрөспүүбүлүкэ туох баар бастыҥ үөрэнээччилэрин түмэр. Ол курдук, мин чугас дьүөгэм Таатта улууһуттан кэлэр.
Оскуола оҕолоругар туох баҕа санааҕын этиэҥ этэй?
– Кыһамньылаахтык үөрэнниннэр, элбэх тэрээһиннэргэ дьаныһан туран кытынныннар. Элбэх күрэхтэһиилэргэ, олимпиадаларга кыттыыны ылыахха наада, талан ылбыт сөбүлүүр үөрэхтэригэр киирдиннэр диэн баҕарабын.
Виктория, дуоһуйа сынньанан, элбэх доҕоттордонон, үйэҕэр умнуллубат түгэннэри сүрэххэр иҥэрэн кэлээр. Биһиги эйигинэн киэҥ туттабыт,оҕолорго бастыҥ холобур буолаҕын.
Давыдова Эмилия,
П.И.Караканов аатынан Мээндиги
орто оскуолатын 10 кылааһын үөрэнээччитэ,
«Тыл баайа» медиа-киинэ