Ахсынньы ыйын 23 күнүгэр Мэҥэ-Хаҥалас улууһуттан 39 оҕо буолан Ил Дархан Харыйатыгар кыттыыны ыла барбыппыт. Биһигини өрөспүүбүлүкэтээҕи лицей-интернакка түһэрбиттэрэ. Онно биһигини кытары Нам улууһуттан уонна Хаҥаластан оҕолор түспүттэрэ.
Тэрээһиммит ахсынньы ыйын 24 күнүгэр буолбута. Уопсайа өрөспүүбүлүкэ үрдүнэн 700-кэ оҕо кыттыыны ылбыта. Үөрүүлээх чааспытыгар бэлэмнэнии күүстээхтик барбыта биллэр көстөр этэ. Бу күнү мин олоҕум тухары умнуллубат кэрэ бэлиэ түгэн буолар диэн этиэхпин баҕарабын. Бииргэ түспүт оҕолорум олус элэккэй, сымнаҕас этилэр, бэйэ-бэйэбитигэр көмөлөһө, ким да кими да хаалларбакка эйэлээхтик сылдьыбыппыт.
Саҥа дьылынан диэн кыра сэмэй бэлэхтэрин ууммуттарыгар, бары соһуйан, үөрэн ол күнү үчүгэй баҕайытык атаарбыппыт. Куратордарбыт Эльза Александровна уонна Алина Павловна бачча улахан эппиэтинэс бэйэлэригэр ылынан, хас биирдии оҕону бэйэлэрин оҕолорун курдук көрбүттэригэр махталым муҥура суох.
Биһиги эрэ улууспут фотоаппарат илдьэ кэлэн элбэх хаартыска оҥорбуттара. Эльза Александровна бэйэтин фотоаппаратын илдьэ кэлбит этэ. Онтон биһигини батыһа сылдьан хас биирдиибитин хаартыскаҕа Алина Павловна түһэртээбитэ. Маннык курдук улахан тэрээһиҥҥэ сылдьан, көрөн-истэн кэлбиппэр оскуолам учууталларын үөрэппит учууталларбар, тренербар Дмитрий Петровичка улахан махталбын тиэрдэбин. Чуолаан кылааһым салайааччытыгар Наталия Гаврильевнаҕа махтанабын, кини мин туспар ис дууһатыттан ыалдьан үөрүүбүн тэҥҥэ үллэстибит киһим буолар.
Уонна саамай улахан оруолу оонньообут төрөппүттэрим буолаллар, кинилэр миигин кыракый эрдэхпиттэн наадалаах хаачыстыбаларбын сайыннаран, идеяларбын өйөөн, араас тэрээһиннэргэ, күрэхтэргэ кыттыыны ыларбар саамай өйөөбүт дьоннорум буолаллар. Төрөппүттэрим баар буоланнар — маннык улахан бырааһынньыкка — Ил Дархан Харыйатыгар барар чиэскэ тигистим.
Элла Сергучева, Ф.Г. Охлопков аатынан Майа орто оскуолата.