Ахсынньы 9 күнүгэр, Бүтүн Арассыыйатааҕы Дьоруойдар күннэрин көрсө, Саха өрөспүүбүлүкэтигэр хорсун быһыыны оҥорбут үөрэнээччилэри чиэстээтилэр. Бу үөрүүлээх быһыы-майгы ахсыс төгүлүн ыытыллар «Дьоруой оҕолор» диэн 2014 сыллаахтан үлэлиир патриотическай бырайыак чэрчитинэн уонна Арассыыйаҕа Быыһыыр сулууспа күнүгэр аналлаах тэрилиннэ.
Хорсун быһыыны оҥорбут барыта 12 үөрэнээччи наҕараадаланна. Олор истэригэр бу сайыҥҥы быһылааҥҥа төрөөбүт дойдуларын уоттан быыһыырга улахан дьону кытта тэҥҥэ үлэлэспит В.Д. Лонгинов аатынан Атамай орто оскуолатын үөрэнээччилэрэ Ярослав Яковлев уонна Михаил Терентьев РФ «За проявленное мужество» мэтээлинэн наҕараадаланнылар.
Бу сайын ууга түспүт кыыс оҕону быыһаабыт Мэҥэ-Хаҥаластан Андриян Захаров РФ «За проявленное мужество» мэтээлинэн наҕараадаланна. Маны таһынан Махтал суруктарынан Дьокуускай куорат, Ньурба уонна Мэҥэ-Хаҥалас улууһун хорсун оҕолоро бэлиэтэннилэр.
РФ сенатора Егор Борисов, Саха сиринээҕи МЧС салайааччыта Павел Гарин, үөрэх уонна наука миниистирин 1 солбуйааччыта Михаил Присяжнай наҕараадалары туттардылар уонна эҕэрдэ, махтал тылларын эттилэр.
Эҕэрдэлэргэ кыттыһабыт, маладьыастар!