Кулун тутар 11 күнүгэр Уус Алдан улууһун Мүрү нэһилиэгин 2-с нүөмэрдээх орто оскуолатын VIII «А» кылааһын үөрэнээччитэ Сабина Павлова «Кэрэни кэрэхсээ» диэн бастакы быыстапката буолан ааста. Дьокуускай куорат киинигэр турар Арчы дьиэтигэр чугас дьоно, аймахтара, доҕотторо, кэрэни кэрэхсээччилэр тоҕуоруһа муһуннулар.
Сабина баата эйгэтигэр кэлбитэ иккис сыла, баататтан араас оҥоһуктары, оонньурдары, хартыыналары оҥорор. Кини үрдүк категориялаах эбии үөрэхтээһин педагогугар Василена Шаринаҕа «Волшебная вата» диэн курска дистанционно үөрэнэр.
Сабина доруобуйатынан хааччахтаах, ол да буоллар олоххо тардыһыыта, дьулуура, тулуура, чугас дьонун өйөбүлэ, хас биирдии күнүттэн астыныыта бу күн барыта көһүннэ. Баатаны таһынан пластилинныырын, оҕуруонан араас киэргэллэри оҥорорун сүрдээҕин астынар. Уруучуканы, ободогу, духи хаатын коллекциялыыр.
Киһи орто дойдуга олороору, туох эрэ кэрэни хааллараары кэлэр. Ол да иһин буолуо Сабина биһиэхэ барыбытыгар холобур буолар. Бу күн кини олоҕор биир умнуллубат түгэнэ буолла, баҕа санаата туолла диэн эрэнэбит. Өссө да сана сонун идеяны куутэбит.
Василена Шарина,
Дьокуускай куорат