Бу дьыл сэтинньи 3 күнүгэр күһүҥҥү сынньал күннэри сөп түбэһиннэрэн, М.К. Аммосов аатынан ХИФУ-га ыалдьыттаатыбыт. Бу тэрээһиҥҥэ 2023-2024 cылларга үрдүк үөрэх кыһалаларыгар ылыы быраабылаларын, ханнык үөрэхтэр баалларын, онно туох ирдэнэрин университет специалистара сиһилии кэпсээтилэр.
Уопсайа 4 улуустан 50-тан тахса выпускник билсэ кэлбитэ кэрэхсэбиллээх. Тэрээһиҥҥэ университет хас да факультета уонна института бэйэтин олоҕун, үгэстэрин, киирии экзаменнарын, ханнык идэни баһылыахха сөбүн о.д.а. бэрт интэриэһинэйдик кэпсээбиттэрин астынныбыт.
Эбии бу күннэргэ психологическай-практическай киин специалистарын кытта көрсүү, экскурсиялар уонна устудьуоннары кытта көрсүү, билсии былааҥҥа турар. Бу сырыыбыт инники идэбитин сөпкө таларбытыгар төһүү күүс буолуоҕа диэн эрэнэбит!
Оттон сэтинньи 10 күнүттэн «Сэргэлээх уоттара» култуура киинигэр салҕыы «Аһаҕас аан» күннэрэ ыытыллар эбит. Оҕолоор, түгэни мүччү тутумаҥ!
11 кылаастар, “Дьоҕур” пресс-киин,
Кэбээйи орто оскуолата.