И. В. Николаев аатынан Харбалаахтааҕы норуот айымньытын дьиэтигэр Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Тааттабыт улууһугар Улуу Кыайыы 80 сылыгар ананар, өрөспүүбүлүкэтээҕи инновационнай площадка буолбут “ҮнүгэсЧээн” бырайыак 1 сылын бэлиэтиир Харбалаахтааҕы «Кэскил» уһуйаан иитиллээччилэрин уонна үлэһиттэрин “Күлэр-үөрэр оҕо саас!” сыллааҕы үлэ түмүгүн көрдөрөр үөрүүлээх кэнсиэрэ буолан ааста.
Кэнсиэри бырайыак дьоруойдара Кэскил уонна Кэскилээнэ ростовой куукулалар үөрүү үҥкүүтүнэн арыйдылар.
Оҥой-соҥой көрбүт ырыа-үҥкүү аргыстаах уһуйаан кырачааннара мустубут ыалдьыттарга эҕэрдэ нүөмэрдэрин бэлэхтээтилэр. Оҕолор баяҥҥа, гармоҥҥа, аккордеоҥҥа, флейтаҕа, күпсүүргэ оонньууллара көрөөччүлэри абылаата даҕаны, сөхтөрдө даҕаны!Кырачааннар бииртэн-биир имигэс хамсаныылаах үҥкүүлэрэ, чуопчаарар ырыалара көрөөччүлэр куттарын тутта, дохсун ытыс тыаһынан доҕуһуолланна.
Уһуйаан үлэһиттэрэ кэрэ куолаһынан кутуллар, истиҥ-иэйиилээх ырыалара, нарын-намчы үҥкүүлэрэ бүгүҥҥү дьоро киэһэни ситэрэн биэрдэ.
Концерт биир сонун түгэнинэн Харбалаахтааҕы уһуйааҥҥа сылдьыаҕыттан СӨ үөрэҕин уонна култууратын туйгуна В.В.Тумановка баяҥҥа уһуйуллубут киэн туттар выпускниктара- Ытык-Күөллээҕи музыкальный оскуола үөрэнээччитэ, элбэх Арассыыйатааҕы күрэхтэр кыайыылаахтара Леня Алексеев кэлэн иитиллибит уһуйааныныгар махталын биллэрэн, имигэс тарбахтара баян кнопкаларын устун сүүрэн, дьикти дорҕоон дьүрүскэнин бэлэхтээбитэ, күүстээх ытыс тыаһынан доҕуһуолланна.
«Чаҕылыс» бөлөх чаҕылхай үҥкүүлэрин иитээччи Халыева С.П. бэлэмнээбит. Бэлэмнэнии бөлөх сэргэх ньүөмэрдэрин А.Н.Осипова,О.М.Андреева. М.А.Егорова туруорбуттар. Флейта алыптаах дьүрүлүн иһитиннэрэ оонньуурга ускуустуба оскуолатын учуутала С.В.Местникова үөрэтэр эбит.
Ырыалары, баяҥҥа доҕуһуоллары В.В. Туманов бэлэмнээбит, онно бары иитээччилэр күүс-көмө буолбуттар.Олох саамай кырачааннар дьоһун ньүөмэрдэрин Н.И. Терякова, Т. П. Мессеева чочуйбуттар.
Уһуйааммыт үлэһиттэрэ сэбиэдиссэй Х.С. Кривошапкина, аҕа иитээччи Н.Н.Никонова сатабыллаах салалталарынан оҕону сайыннарыыга саҥаны, кэскиллээҕи таба тутуһан, олус бэриниилээхтик үлэлииллэрин үтүө түмүгэ-дьон биһирэбилин ылбыт кэнсиэргэ толору көһүннэ. Кэлэктиип түмсүүлээх буолан, үлэлэрэ үрдүк ситиһиилээх, өрөспүүбүлүкэҕэ биллэр! Уһуйааммыт иитиллээччилэрэ, үлэһиттэрэ Өрөспүүбүлүкэ күнүн көрсө маннык дьоро киэһэни бэлэхтээбиттэриттэн астынан, долгуйан туран, дьоллоох оҕо сааһы, айымньылаах үлэлэригэр үрдүктэн үрдүк ситиһиилэри баҕарабыт!
Валентина Кривошапкина, Харбалаах, Таатта.