Сочи куоратын Дагомыс оройуонугар Россиятааҕы Естествознание академията ахсыс төгүлүн “Наукаҕа хардыы” диэн ааттаах научнай-чинчийэр үлэ күрэҕин тэрийэн ыытта. Биһиги лиссиэйбититтэн 4-с кылаас оҕолоро кытыннылар.
Алина Кутукова, Айсен Индеев, Богдан Максимов учуутал Мотрена Васильевна Канаева уонна төрөппүттэрэ арыаллаах кыттан кэллилэр. Оҕолор үһүөн 3 истиэпэннээх дипломан уонна “За лучший устный доклад” анал аат хаһаайына буоллулар.
Бу оҕолор чинчийиигэ бастакы кыттыылара буолбатах, хайыы-үйэ өрөспүүбүлүкэҕэ араас таһымнаах ааҕыыларга миэстэлээхтэр. Чинчийэр үлэлэрин иккис кылаастан саҕалаабыттар. Тиэмэлэрэ да араас: Алина “Старинные математические измерения якутских, русских, и в зарубежных сказках», Айсен “Дневник наблюдения, как показатель потепления климата”, Богдан “Разведение двух пород лошадей: якутской и чисто верховой”.
Сочига оҕолор пааркаҕа күүлэйдээбиттэр, Хара муораҕа сөтүөлээн дуоһуйбуттар, куорат устун күүлэйдээбиттэр. “Роза Хутор”, “Красная поляна” диэн сирдэргэ экскурсияҕа сылдьыбыттар. Сочиттан төннөн иһэн, дойдубут тэбэр сүрэҕин, Москва куораты, көрбүттэр. Дойдуларыгар ситиһии кынаттаах уонна бииргэ үөрэнэр оҕолоругар кэһиилээх кэлбиттэр.
Ааптардар: Юрианна Дьяконова, Намыына Петрова, “Репортер” түмсүү.
Хамаҕатта саха-француз лиссиэйэ, Нам.