Cаҥа дьыллааҕы кыһыҥҥы уһун сынналаҥ кэмигэр дьоллоох Дьокуускай куоракка М.К. Аммосов аатынан ХИФУ иһинэн үлэлиир «Ситиһии академията» диэн оскуолаҕа үөрэнэн кэллим. Бу оскуолаҕа БКЭ (ЕГЭ) бэлэмнииллэр. Мин бу кууруска сылдьан профильнай математикаҕа бэлэмнэнним, олус элбэх саҥаны биллим, наһаа үчүгэйдик үөрэнэн, астынан аҕай кэллим!
Бастаан ыарахан этэ, онтон учууталларга билбэтэх, өйдөөбөтөх боппуруостарбын ыйыппыппар, барытын холкутук быһааран биэрэн, истиҥник кэпсэтэн, үөрэтэр матырыйаалбын сатаабытым. Онтон олус үөрбүтүм. ХИФУ математикаҕа үөрэтэр учууталлар оҕолорго толору, илдьиритэн быһааран биэрэллэрин сөхтүм, дьэ, сатаабаппын сатаан үөрдүм уонна туттарыахпын сөп эбит диэн санаа үөскээтэ. Аны манна кэлэн, элбэх доҕоттордоннум. Наһаа элбэх олус өйдөөх, ураты толкуйдаах оҕолор бааллар эбит. Онон кыһыҥҥы сынньалаҥ кэмигэр элбэҕи билэн-көрөн, саҥа оҕолору кытта билсиһэн үөрдүм, дуоһуйдум, астынным аҕай.
Бары бииргэ уопсайга олорбуппут, ол бэйэтэ эмиэ туспа ураты дьикти эйгэ диэххэ сөп. Кылгас кэмҥэ да буоллар, абитуриент олоҕор киирэн, элбэх оҕолордуун билсэр, эксээмэҥҥэ бэлэмнэнэр наһаа үчүгэй, олус туһалаах эбит. Үһүс ураты — кууруска үөрэнэр кэммэр телефон диэҥҥэ, Интернеккэ олох киирбэтим, наадыйбатым даҕаны, урут наһаа өр телефоҥҥа олорооччум. Куурус кэмигэр араас
тэрээһиннэр буолан аастылар, барытыгар көхтөөхтүк кыттан, бириэмэни билбэккэ да хаалабыт.
Мин бу кыһыҥҥы оскуолаҕа обществознанияны уонна математиканы үөрэттим. Бу предметтэри үөрэппит учууталларга Валерий Васильевичка, общество учуутала, Афанасий Егоровичка, математик, истиҥник махтанабын, айымньылаах үлэлэригэр ситиһиини, кытаанах доруобуйаны баҕарабын. Киэҥ-холку майгылаах, элбэх билиилээх учууталлары кытта, кылгас да кэмҥэ буоллар, алтыһан ааспыппыттан олус үөрэбин, хаһан даҕаны кыһыҥҥы оскуола дьикти уруоктарын умнуом суоҕа.
Бу уруоктары санаатахпына, учууталлар үөрэтиилэрэ бу көстөн кэлэр курдук. Аны сааскы сынньалаҥ кэмигэр бу кууруска, БКЭ-ҕэ бэлэмнэнэ, үөрэ-көтө барарга бэлэммин! Баҕа санаам барыта туолуоҕа диэн эрэнэбин!
Ксения ДМИТРИЕВА, 11 кылаас үөрэнээччитэ, Усуйаана улууһа, Хаһааччыйа орто оскуолата,
«Дьааҥы кыымнара» эдкорпост.