РФ Президенэ Владимир Путин биллэрбит «Образование» национальнай бырайыак чэрчитинэн ыытыллыбыт «Успех каждого ребенка» («Хас биирдии оҕо ситиһиитэ») региональнай бырайыагынан Горнай Күөрэлээҕин оскуолата тустуу көбүөрүнэн хааччылынна.
Өбүгэлэрбит саҕаттан тиийэн кэлбит төрүт оонньууларбыт — хапсаҕай, кэлин көҥүл тустуу — билиҥҥи кэмҥэ дьон-сэргэ сөбүлээн көрөр, дьарыктанар спорт сүрүн көрүҥнэринэн буолаллар. Ол иһин бу көрүҥнэри салгыы сайыннарыы, үүнэр көлүөнэни уһуйуу улахан оруоллаах.
Ааспыт 20-с үйэ 1970-с сылларыгар сахалар аар-саарга аатырбыт олимпиецтарбыт үһүөн тыа сириттэн төрүттээхтэрэ. Ол иһин өрөспүүбүлүкэ спордун дьаһалтата тыа сирин оскуолаларыгар ураты болҕомтотун уурара хайҕаллаах уонна сиэрдээх. Тыа сирин оскуолаларыгар сөптөөх усулуобуйаны тэрийдэххэ, аныгы спортивнай инвентарынан хааччыйдахха уонна дьаныһан туран дьарыктаатахха, бииртэн биир ситиһиилэр кэлэн иһиэхтэригэр эрэниэххэ сөп.
Соторутааҕыта Күөрэлээх дьонугар-сэргэтигэр үөрүүлээх түгэн тосхойдо. Ол курдук, олохтоох оскуола спортивнай саалатыгар өрөспүүбүлүкэ спордун министиэристибэтэ тустуу көбүөрүн анаабыта кэллэ. Бу көбүөр грант быһыытынан СӨ Үөрэхтээһин уонна наука министиэристибэтин «Успех каждого ребенка» («Хас биирдии оҕо ситиһиитэ») национальнай бырайыагын чэрчитинэн кыайыылааҕынан тахсан бэрилиннэ.
Бырайыак ааптарынан, көҕүлээччитинэн нэһилиэк олохтооҕо, «Айылгы» оҕо саадын иитээччитэ Мария Прокопьевна Яковлева буолар. Бырайыак олоххо киириитин олохтоох оскуола дириэктэрэ В.В. Тимофеев уонна дириэктэри үөрэх чааһыгар солбуйааччы В.Ю. Игнатьева бириэмэтигэр күүстээх өйөбүлү оҥорбуттара төһүү буолла. Тыа сирин оҕолоро эт-хаан өттүнэн чэгиэнник сайдалларыгар ис сүрэҕиттэн кыһаллар, үлэтигэр бэриниилээх иитээччигэ Мария Прокопьевна Яковлеваҕа нэһилиэк олохтоохторо, төрөппүттэр, оскуола үөрэнээччилэрэ барҕа махталларын тиэрдэллэр.
Ааптар: Константин Жирков.