Муус устар бастакы нэдиэлэтэ саха норуотун уһулуччулаах салайаачыта, судаарыстыбаннай деятель, ССКП Саха сирин уобаластааҕы кэмитиэтин бастакы сэкэрэтээрэ, Аҕа дойду Улуу сэриитин кыттыылааҕа Гавриил Иосифович Чиряев төрөөбүтэ 100 сылын көрсөр тэрээһиннэргэ ананна. Ол курдук, муус устар 4 күнүгэр «Сокровищница Якутии» быыстапка дьиэтигэр Гавриил Иосифович аатынан алмаас сүрэхтэниитэ буолан ааста.
Тэрээһиҥҥэ СӨ үп-харчы министиэристибэтин миниистирин эбээһинэһин толорооччу Иван Иванович Алексеев, СӨ промышленностька уонна геологияҕа миниистирин солбуйааччы Антон Иванович Андросов, Нерюнгри оройуонун баһылыга Роман Михайлович Щегельняк, Бүлүү куорат Г.И. Чиряев аатынан музей дириэктэрэ Михаил Семенович Томскай, СӨ баайын-дуолун харайар судаарыстыбаннай тэрилтэ бэрэссэдээтэлин солбуйааччы Иван Иванович Кычкин уонна Гавриил Иосифович чугас, аймах-билэ дьоно кыттыыны ыллылар, санааларын эттилэр.
Сахаа чулуу уолун аатынан ааттаммыт алмаас 1995 сыллаахха тохсунньу 6 күнүгэр Удачнайдааҕы горнай-обогатительнай комбинат 12 №-дээх фабрикатыгар хостоммута биллэр.
Гавриил Иосифович Чиряев 1965 сылтан 1982 сылга диэри өрөспүүбүлүкэни салайбыта. Ол бириэмэҕэ өрөспүүбүлүкэ соҕуруу өттө күүскэ сайдан саҕалаабыта: Нерюнгри куорат төрүттэммитэ, Беркакитка диэри тимир суол оҥоһуллубута. Кини көҕүлээһининэн Дьокуускай, Бүлүү, Нерюнгри ГРЭСтэрэ тутуллубуттара. Гавриил Иосифович олох хас биирдии салаатын хабан сайыннарбыт сүҥкэн өҥөлөөх, өрөспүүбүлүкэ саҥа таһымҥа тахсарыгар уҕараабат кылаатын киллэрбит үтүөлээх саха чулуу уола буолар.
Тэрээһинтэн сиһилии видео-матырыйаалбытыгар көрүҥ: