Биһиги Бүлүүбүт улууһун Сыдыбыл нэһилиэгиттэн Инстаграм уонна Тик ток туһанааччыла сэргээн көрөр киһилэрин Павел Негодины @escanor_baibas көрсөн кэпсэттибит.
Хаһааҥҥыттан спордунан умсугуйан дьарыгырбыккытый?
Уруккаттан сөбүлээн дьарыктанабын. Бастаан чэпчэки атлетикаттан саҕалаабытым. Кыра кылааска үөрэнэ сырыттахпына убайым дьарыкка илдьэ бара сылдьыбыта. Ол кэнниттэн куруук улахан оскуолаҕа баран сүүрэр буолбуппут. Онтон аҕыйах сылынан хапсаҕайынан дьарыктанар буолбуппут. Наһаа улаханнык миэстэлэспэт этибит, кыралаан, үһүс — иккис миэстэ буолааччыбыт уонна ыһыахтарга күрэхтэһээччибит. Онтон бу дьарыкпар бэйэм ылсыбытым, ким да миигин акробатикаҕа иҥин үөрэппэтэҕэ. Биирдэ телевизорынан көрөн баран, ойуоккалаан, ыстаҥалаан боруобалаабытым. Онтон саҕалаан бэйэм сөбүлээммин ылсыбытым.
Оскуолаҕа үөрэнэ сылдьан спортан ураты тугунан дьарыктанар этигиний?
Мин оскуолаҕа үчүгэйдик үөрэммитим диэбэппин эрээри, дьонум үчүгэйдик үөрэнэрбэр баҕараллара, ол иһин кыһаллар этим. Кыра кылааска үөрэнэ сылдьаммын гитараннан оонньуурга кыралаан үөрэнэ сатаабытым. Онтон үҥкүү куруһуогар сылдьбытым. Ону таһынан КВН-ҥа сылдьыбытым, Бүлүүгэ киирэн улуус күрэҕэр кыттааччыбыт. Республикаҕа фестивальга кыттарбытыгар флешмоб туруорбутум, ону үҥкүүлээбиппит. Биир кэмҥэ оскуолабытыгар кыра тэттик киинэлэри устар “Мэник тэник тэбэнэттэр” диэн куруһуок баара. Онно “Ералаш” курдук оонньоон уһулларбыт. Билигин ол киинэлэрбит ютубка бааллар.
Билигин ханна үөрэнэҕиний?
Билигин Дьокуускайга индустриально — педагогическай колледжка үөрэнэ сылдьабын. Эрдэ тохсус кылаас кэннэ Амма Алтаныгар “тракторист — машинист селькохозяйственного оборудования и производства” диэн идэҕэ үөрэммитим. Онтон куоракка техник — сварщикка үөрэнэ сылдьан армияҕа сулууспалыы барбытым. Армияттан кэлэн баран бу үөрэхпэр киирбитим.
Тоҕо инстаграмҥытыгар никкыт @escanor_baibas диэний?
“Эсканор” диэн аниметтан персонаж, убайым көрө олордоҕуна тэһийбэккэбин кинилиин көрсүбүтүм. Онно миэхэ майгынныыр курдук персонаһы көрөммүн бэйэбин итинник аатттыыр буолбутум, онтон Байбаас диэн ийэм таптаан Байбал диэнтэн ааттаабыта.
Подписчиктарыҥ Тыгын оонньуутугар оонньуугун дуо диэн куруук туоһулаһаллар эбит, ону эн туох дии саныыгын?
Бастаан бэлэмнэнэ сылдьыбытым, уруккаттан оннук баҕа санаалаах этим. Ол гынан баран бэйэм мөлтөх өрүттэрбин билэбин, холобура, оҕунан ытыыга, таас көтөҕүүтүгэр иҥин. Ол курдук миэхэ дьарыктыыр киһим суох уонна дьарыгым хайысхата арыый атын буоллаҕа дии.
Бу кэнники ситиһииҥ аан дойдутааҕы таһымнаах Nomad Stunts каскадердар осуолаларыгар талыллыбытыҥ буолар. Бу манна хайдах талыллан киирдиҥ?
Чуолкай хас киһи кыттыбытын билбэппин. Заявка уонна бэйэм туспунан видеоролик ыыппытым. Онтон ыҥырбыттарыгар кастиҥҥа сылдьыбытым. Бу ый ортотугар үөрэнэ барабын. Үөрэҕим алта ый устата буолар. Онтон салгыы бэйэбин хайдах көрдөрөрбүттэн тутулуктаах буоллаҕа дии.
Билигин оскуолаҕа үөрэнэ сылдьар, бэйэҥ уруккуҥ курдук оҕолорго тугу сүбэлиэҥ этэй?
Мин санаабар наһаа компьютерынан үлүһүйбэккэ, онтон араҕан, дьарыктанан бэйэ доруобуйатын көрүнүөххэ наада. Тугу эмит ситиһэргэ баҕа санаа күүстээх буолуохтаах. Олох кыбыстан туран хаалымыахха наада. Мин бэйэм кыбыстанньаҥ киһибин, ону табаарыстарым уонна дьонум өйөөбүттэрэ–сүбэлээбиттэрэ. Баар түгэни туһанан иһиэххэ наада. Таах сибиэ гымматахпын диэн хомойо сылдьыах кэриэтэ, боруобалыахха наада, сыыһалаах да буоллун. Оччоҕо барыта табыллан иһиэ.
Кэпсэттэ Юлия ФОМИНА
“Репортер” медиа – киин, “Кэскил” Бүлүү к.